فوتو: Google

وتكەن جىلى اۋە اپاتتارى سالدارىنان قازا بولعانداردىڭ سانى 2017 جىلمەن سالىستىرعاندا ەداۋىر ارتقان.  

بۇل تۋرالى نيدەرلاندىدا ورنالاسقان Aviation Safety Network ۇيىمى («اۆياتسيالىق قاۋىپسىزدىك جەلىسى»، ASN) حابارلادى. كوممەرتسيالىق اۆياكومپانيالار تاريحىندا 2017 جىل ەڭ قاۋىپسىز سانالادى. ASN مالىمەتتەرى بويىنشا، 2018 جىلى كوممەرتسيالىق اۆياتسيادا 15 اۋە اپاتى ورىن العان: 12 جولاۋشى جانە 3 جۇك تاسۋشى ۇشاق قيراپ، 556 ادام قازا تاپتى.

2018 جىلعى ەڭ ءىرى اپاتتار:

29 قازان. يندونەزياداعى Lion Air اۆياكومپانياسىنىڭ «بوينگ-737 MAX» ۇشاعى جاكارتادان ياۆان تەڭىزىنە جاقىنداعاندا اپات ورىن الىپ، بورتتاعى 189 ادام قازا تاپتى. كوميسسيانىڭ الدىن الا قورىتىندىسى بويىنشا، تەحنيكالىق اقاۋى بار ۇشاق اۋەگە كوتەرىلمەۋى ءتيىس بولعان.

18 مامىر. Cubana de Aviacion اۆياكومپانياسىنىڭ «بوينگ-737-201» ۇشاعى گاۆانا ماڭىندا اپاتقا ۇشىراپ، سالدارىنان 112 ادام قازا تاپتى. اپات سەبەبى – ادام فاكتورى.

11 اقپان. ان-148 «ساراتوۆ اۆياجەلىلەرى» اتالاتىن ان-148 ەكيپاجدىڭ قاتەلىگىنەن ماسكەۋ تۇبىندە قيرادى.

18 اقپان. Iran Aseman Airlines اۆياكومپانياسىنىڭ ۇشاعى يران تاۋلارىندا، ال 12 ناۋرىزدا كاتماندۋ اۋەجايىنا جاقىن جەردە Bombardier Dash Q-400 ۇشاعى اپاتقا ۇشىرادى.

ASN مالىمەتتەرى بويىنشا، اۆياتسيالىق قاۋىپسىزدىك سالاسىنداعى جاعداي سوڭعى ۋاقىتتا ايتارلىقتاي جاقسارعان. ۇيىم باس ديرەكتورى حاررو رانتەر: «بۇرىنعىمەن سالىستىرعاندا الەمدىك دەىگەيدە اۋە قاۋىپسىزدىگى جاقسارعان. بىراق، ءالى دە تەحنيكا سالدارىنان ۇشۋعا رۇقسات بەرىلمەيتىن ۇشاقتار جەتەرلىك. كوپ جاعدايدا ۇشقىشتاردىڭ قاتەلىگى سالدارىنان بورتتاعى ادامدار جاپا شەگەدى. سول ءۇشىن ۇشقىشتاردى دايىنداۋ سالاسىنا جانە تەحنيكالىق جاعداي باسا ەسكەرىلۋى ءتيىس»، – دەيدى.

سوڭعى بەس جىلدا 25 ءىرى اپاتتىڭ كەم دەگەندە 10-ى ۇشقىشتاردىڭ باقىلاۋ نەمەسە باسقارۋدى جوعالتۋىنا بايلانىستى بولعان. ال قالعان سەبەپتەر تابيعي جاعدايلارمەن بايلانىستى.