ارمەنيا «جىل مەملەكەتى» اتاندى

ارمەنيا «جىل مەملەكەتى» اتاعىنا يە بولدى.

2013 جىلدان باستاپ سوڭعى ون ەكى ايدا ىلگەرىلەي تۇسكەن ۇزدىك مەملەكەتتەر ءتىزىمىن جاريالايتىن The Economist جۋرنالى بيىل ارمەنيا «جىل مەملەكەتى» قۇرمەتتى اتاعىنا لايىق دەپ تاپتى. جۋرنال ارمەنيا حالقى ءپۋتينشىل باسشى اتانعان سەرج سارگوسياننىڭ بيلىكتەن كەتۋىن تالاپ ەتىپ، ساياسي جيىندارعا رەسەيدىڭ ارالاسۋىنا ەش مۇمكىندىك بەرمەگەنىن جانە ەركىندىك پەن ادىلەتتىلىككە ۇمتىلعانىن جازىپ، بيلىكتىڭ قىزمەتى مەن حالىق تولقۋلارىنان كەيىن ايقىن دەموكراتيا مەن جاڭارۋعا مۇمكىندىگى بار بىردەن-ءبىر مەملەكەت دەگەن باعا بەردى.

ارمەنيانىڭ پرەمەر-مينيستر قىزمەتىن اتقارۋشى، جەمقورلىق تاقىرىبىندا ءبىراز ۋاقىت بويى جازعان جۋرناليست نيكول پاشينيان بيلىككە كەلگەن كەزدەن باستاپ 29 رەفورمانى جۇزەگە اسىرىپ ۇلگەرگەن. The Economist جۋرنالى پاشينياننىڭ اتقارعان ەلەۋلى رەفورمالارىنا دا توقتالىپ وتكەن. سولاردىڭ قاتارىندا، «گۇلدەنگەن ارمەنيا» جانە «داشناكتسۋتيۋن» پارتياسى ۇسىنعان ۇكىمەت مينيسترلەرى مەن گۋبەرناتورلاردى جۇمىستان بوساتۋعا نۇسقاۋ بەرۋى; بيلىكتى اسىرا ناسيحاتتاپ، استىرتىن ارەكەتتەردى جاسىرىپ قالۋمەن اينالىساتىن «ارمەنيا» تەلەارناسىنىڭ باسشىلارىن ورنىنان الۋى; قورعانىس ءمينيسترىنىڭ ورىنباسارى، گەنەرال مانۆەل گريگوريان، ونىڭ ايەلى مەن ۇلى ەچميادزينگە ارميان سولداتتارىنا گۋمانيتارلىق كومەك بەرگەنى جانە قارۋدى زاڭسىز ساقتاعانى ءۇشىن تۇتقىنداۋ تۋرالى شەشىم شىعارۋىن ەرەكشە اتاپ وتكەن. سونداي-اق پاشينيان ءىرى سۋپەرماركەتتەرگە بويكوت جاريالاۋ ارقىلى جۇگەنسىز كەتكەن باعانى تومەندەتىپ، شەتەلدىك جانە وتاندىق كومپانيالاردىڭ استىرتىن ارەكەتتەرىن اشكەرەلەگەن.

بيىل ساۋىردە ارمەنيا استاناسى ەرەۆان قالاسىندا وپپوزيتسيا جاقتاستارى ەكس-پرەزيدەنت سەرج سارگسياننىڭ پرەمەر-مينيستر بولىپ تاعايىندالۋىنا بايلانىستى قارسىلىق اكتسياسىن وتكىزگەن. وپپوزيتسيا وكىلدەرى مەن پوليتسيا اراسىندا قاقتىعىس ورىن الىپ، سالدارىنان 33 ادام ءتۇرلى دەنە جاراقاتتارىمەن اۋرۋحاناعا جەتكىزىلگەن بولاتىن. حالىق ەرەۋىلىنەن سوڭ، سارگسيان وتستاۆكاعا كەتتى. ال مامىردا نيكول پاشينيان پرەمەر-مينيستر لاۋازىمىن يەلەندى.

"The Qazaq Times"