اقش-تا قازاقستاننىڭ ەكى ازاماتى ايىپتالۋدا

اقش-تا كيبەرالاياقتىق جولمەن قارجى تاپقان دەگەن كۇدىكپەن ەكى قازاقستاندىق، التى رەسەيلىك ازاماتتىڭ ارتىنان قىلمىستىق ءىس باستالدى. سوڭعى مالىمەت بويىنشا، تسيفرلى جۇيەنىڭ قىر-سىرىن جاقسى مەڭگەرگەندەر 40 ملن دوللار شاماسىندا قارجى جىمقىردى دەگەن كۇدىككە ىلىنگەن.

نيۋ-يوركتىڭ شىعىس وكرۋگ شتاتىنىڭ پروكۋراتۋراسى قازىرگى تاڭدا ولاردىڭ  تاعى دا قانداي قىلمىسقا قاتىسى بار ەكەندىگىن انىقتاۋدا. ەسىمدەرى بەلگىلى بولعان ازاماتتاردىڭ كەيبىرەۋى وزگە ەلدەردەن ۇستالعان.  قازاقستان ازاماتى سەرگەي وۆسياننيكوۆ، مالايزيادا ەۆگەني تيمچەنكو ەستونيادا قۇرىقتالعاندىعى بەلگىلى بولدى. سول سەكىلدى رەسەيلىك الەكساندر جۋكوۆ بولگاريادا تۇتقىندالعان. بارلىق ۇستالعان ازاماتتار جاقىن ۋاقىتتا اقش-قا جەتكىزىلەدى دەپ جوسپارلانۋدا. بۇدان بولەك ميحايل اندرەەۆ، دەنيس اۆدەەۆ، دميتري نوۆيكوۆ جانە الەكساندر يساەۆ  بوستاندىقتا ءجۇر.

ەستەرىڭىزگە سالا كەتەيىك، اعىمداعى جىلدىڭ مامىر ايىندا الەۋمەتتىك جەلىلەر مەن ەلەكتروندى مەكەن-جاي ارقىلى ادامداردىڭ قاراجاتىن جىمقىراتىندار قازاقستان اۋماعىنان دا توبە كورسەتكەن. بىرنەشە سۇراققا وڭاي جاۋاپ بەرگەندەرگە كەيىننەن سىياقىنى جىبەرۋ ءۇشىن ارنايى ەسەپشوت ءنومىرىن سۇراعان.  سەزىكتەنگەن جاندار بىردەن قۇزىرلى ورىندارعا جۇگىنسە، ەندى ءبىرى تۇزاقتارىنا ءىلىنىپ جاتتى. سوندىقتان جەلى ارقىلى وڭاي اقشاعا كەنەلۋ، تەك كيبەرالاياقتاردىڭ عانا قولىنان كەلەتىندىگىن ساراپشىلار ەسكەرتىپ وتىر.

“The Qazaq Times”