اقش يراننىڭ حيميالىق قارۋدى ءوندىرىپ وتىرعانىن ايتتى

قۇراما شتات يراننىڭ حيميالىق قارۋدى تاراتۋعا قارسى ۇيىمنىڭ بەلگىلەمەلەرىن بۇزعانىن مالىمدەدى. ءارى، يراندى حيميالىق قارۋدى تاراتپاۋ تۋرالى ەشقانداي ءىس-شارا اتقارىپ وتىرعان جوق دەپ سىنعا الدى.

اقش ارنايى وكىلى ۋورد گااگادا وتكەن حيميالىق قارۋعا قارسى ۇيىمنىڭ جىل سايىنعى وتىرىسىندا، يرانداعى ورتالىق جۇيكە جۇيەسىنە زاقىم كەلتىرەتىن حيميالىق زاتتاردى ءوندىرۋ ءىسىنىڭ دامىپ كەلە جاتقانى قۇراما شتاتتى الاڭداتىپ وتىرعانىن ايتتى. سونداي-اق، اقش وكىلى يران بۇل حيميالىق قارۋلاردى اسكەري ارەكەتتەرگە پايدالانۋى مۇمكىن ەكەنىن ايتتى، الايدا، ناقتى دەرەككوزدەرىن كورسەتپەدى.

ۋورد يراننىڭ حيميالىق قارۋعا قارسى ءۇش بىردەي ەرەجەنى بۇزعانىن العا تارتتى. يران يسلام رەسپۋبليكاسى بولسا، 1997 جىلعى حيميالىق قارۋ تۋرالى كونۆەنتسياعا قول قويدى.

وتكەن اپتادا امەريكالىق باق ترامپ ۇكىمەتىنىڭ لاۋازىمدىلارىنىڭ سوزىنە سىلتەمە جاساي وتىرىپ، قۇراما شتات تارابى حيميالىق قارۋعا قارسى ۇيىمنىڭ ءداستۇرلى جينالىسىنان پايدالانىپ، يراننىڭ حيميالىق قارۋ ماسەلەسىن ورتاعا سالاتىنىن حابارلاعان ەدى. اقش-تىڭ ارنايى وكىلى امەريكالىق باق-تىڭ بۇل دەگەنىن راستاپ شىقتى.

اقش بيىل مامىردان باستاپ يرانعا ديپلوماتيالىق جانە ەكونوميكالىق قىسىمدار ءتۇسىرىپ كەلەدى. ترامپ اكىمشىلىگى يزرايل بارلاۋ اگەنتتەرىنىڭ مالىمەتتەرىن العا تارتا وتىرىپ، يراندى يادرولىق باعدارلامالاردى دامىتىپ وتىر دەپ ايىپتادى. ال، 2015 جىل قول قويىلعان يران يادرولىق كەلىسىمىنەن ءبىر جاقتى باس تارتقان اقش، تەھران بيلىگى يادرولىق وق تۇمسىقتاردى جەتكىزەتىن بالليستيكالىق زىمىراندار جوباسىن دايىنداپ جاتقانىن ايتادى.

“The Qazaq Times”