ينتەرپولدىڭ جاڭا پرەزيدەنتى تاعايىندالدى

دۋبايدا وتكەن باس اسسامبلەيا ۇيىمىنىڭ 87-ءشى سەسسياسى كەزىندە وڭتۇستىك كورەيالىق كيم چون يان ينتەرپولدىڭ جاڭا پرەزيدەنتى بولىپ تاعايىندالدى.

اتالعان لاۋازىمعا كورەي ەلىنىڭ ازاماتىنان بولەك، رەسەي ىشكى ىستەر دەپارتامەنتىنىڭ گەنەرال-مايورى، بۇعان دەيىن ينتەرپولدىڭ ەۋروپا بويىنشا ۆيتسە-پرەزيدەنتى بولعان الەكساندر پروكوپچۋك ۇمىتكەرلىك ەتكەن.

اعىمداعى جىلدىڭ قىركۇيەك ايىندا ءىز-ءتۇسسىز جوعالعان ەكس-پرەزيدەنت مەن حۋنۆەي كەيىننەن قىتاي ەلىنەن تابىلىپ، ۇستىنەن جەمقورلىققا قاتىسى بار دەپ ايىپتالعان بولاتىن.  وسى وقيعادان كەيىن مەن حۋنۆەي قازان ايىندا وتستاۆكاعا كەتۋ تۋرالى ءوتىنىش بەرگەن. ال، ونىڭ ورىنىنا ۆيتسە-پرەزيدەنت كيم چون يان وسى ۋاقىتقا دەيىن باسشىلىق جاساپ كەلدى.

بۇدان بۇرىن اقش مەملەكەتتىك حاتشىسى مايك پومپەو «حالىقارالىق قىلمىستىق ۇيىمعا لاستانباعان ادام باسشى بولۋى ءتيىس، وسى رەتتى كيم مىرزاعا سەنىم بىلدىرەمىن» دەپ مالىمدەگەن ەدى.  سونىمەن بىرگە اقش-تىڭ ءبىر توپ سەناتورلارى دونالد ترامپقا پروكوپچۋكتىڭ ۇمىتكەرلىگىنە قارسى وتىنىشتەرىن بىلدىرگەن. ولاردىڭ ويىنشا، بۇل قادام رەسەيدىڭ ينتەروپول زاڭدارىن بۇزۋعا اكەلىپ سوعۋى مۇمكىن.  سەبەبى، ۇيىمدى پايدالانۋ ارقىلى ساياسي قارسىلاستارىن، مەملەكەتتىك يدەولوگيامەن كەلىسپەيتىندەردى جانە جۋرناليستەردى باقىلاۋدا ۇستاپ وتىرۋى مۇمكىن ەكەندىگىن جەتكىزگەن.

"The Qazaq Times"