ەۋروپا قاۋپسىزدىگىن كوبىرەك قورعايتىن ۇيىمدى ەۋروپاعا جاتپايتىن ەلدەر اسىراپ وتىر

ناتو باس حاتشىسى يەنس ستولتەنبەرگ بەرليندە جاساعان بايانداماسىندا، اتالعان ۇيىم قازىر ەۋروپانىڭ قاۋىپسىزدىگى ءۇشىن اسا ماڭىزدى ءرول اتقارىپ تۇرعانىمەن، ۇيىمنىڭ باستى تىرەگى ەۋروپالىق وداققا مۇشە ەمەس ەلدەر ەكەنىن مالىمدەدى.

ستولتەنبەرگتىڭ مالىمەتىنە قاراعاندا، بريتانيانىڭ ەو-دان ءبولىنۋى، ۇيىم ىشىندەگى تەڭگەرىمدەرگە دە ۇلكەن وزگەرىستەر الىپ كەلگەن. قازىر ناتو-نىڭ 80 پايىز قارجىسىن ەۋروپا وداعىنا مۇشە ەمەس ەلدەردەن كەلەدى. دەگەنمەن، ول ەۋروپا ەلدەرىنىڭ قورعانىس قابلەتىن كۇشەيتۋگە دەگەن تالپىنىسىن جوعارى باعالايدى. ەۋروپا ەلدەرىنىڭ وسى تالپىنىسى الداعى ۋاقىتتا ۇيىمدى ءتىپتى دە قۋاتتى ىنتىماقتاستىق ەتۋى مۇمكىن.

شىن مانىسىندە دە، رەسەيدىڭ اسكەري قۋاتىنىڭ كۇشەيۋى ەۋروپا ەلدەرىن الاڭداتتى. اسىرەسە، شىعىس ەۋروپاداعى رەسەي شەكاراسىنا جاقىن شاعىن ەلدەر ەگەمەندىگىنە كەپىل بولۋ ءۇشىن ناتو-عا كوبىرەك مۇددەلى. ال، بۇعان دەيىن ۇيىمنىڭ باستى دەمەۋشىسى بولىپ كەلە جاتقان قۇراما شتاتتار ترامپ بيلىگىنەن كەيىن، ناتو-عا بولىنەتىن قارجىنى ازايتاتىنىن ءبىلدىردى. جاقىندا عانا اقش-تىڭ ەۋروپادا تۇرعان بۇرىنعى جوعارى اسكەري شەندىسى ۇيىم جينالىسىندا مالىمدەمە جاساپ، الداعى ۋاقىتتا ەۋروپا ءوز قاۋىپسىزدىگىنە ءوزى جاۋاپتى بولۋى كەرەك ەكەنىن، ال، قۇراما شتاتتار ءوزىنىڭ تىنىق مۇحيتتاعى باستى قارسىلاسىنان قورعانۋ ءۇشىن كوبىرەك قارجى جۇمسايتىنىن جەتكىزگەن ەدى.

ال، ستولتەنبەرگ كەزەكتى مالىمدەمەسى ارقىلى، ۇيىمنىڭ الداعى شىعىندارىنىڭ كوبى ەۋروپالىق ەلدەردىڭ موينىنا جۇكتەلەتىنىن دە اڭعارتادى. ناتو مەن رەسەي اسكەري قۋاتىن جارىسا كۇشەيتۋ ۇستىندە. تاراپتار قانداي دا ءبىر تۇسىنىستىككە ۇمتىلۋ ءۇشىن ارەكەت ەتكەنى بايقالمايدى. كەرىسىنشە، ءبىر تاراپتىڭ اسكەري ارەكەتى ەكىنشى جاقتان وسىعان ۇقساس ارەكەتپەن جاۋاپ بەرىلۋدە.

“The Qazaq Times”