اقش كومپانيالارىنىڭ قۇپيا دەرەكتەرىن ۇرلاعان قىتايلىق تىڭشىلار انىقتالدى

قۇراما شتاتتىڭ ادىلەت دەپارتامەنتى سەيسەنبى كۇنى مالىمدەمە تاراتىپ، قىتايدىڭ بارلاۋ قىزمەتكەرلەرى حاكەرلەر مەن ينسايدەرلەر ارقىلى جەكە مەنشىك كومپانيالاردىڭ كومپيۋتەرلىك جۇيەلەرىنە كىردى، كوممەرتسيالىق اۋە كومپانيالار پايدالاناتىن تۋربينا قوزعالتقىشىنىڭ دەرەكتەرىن ۇرلاۋعا تىرىستى دەپ ايىپتادى. بۇل اقش ادىلەت دەپارتامەنتىنىڭ قىركۇيەكتەن بەرى قاراي ءۇشىنشى رەت قىتايدىڭ جياڭسۋ ۇلتتىق قاۋىپسىزدىك اگەنتتىگىنىڭ قىزمەتكەرلەرىن ايىپتاۋى.

اقش ادىلەت دەپارتامەنتىنىڭ مالىمدەمەسىندە، قىتايدىڭ جياڭسۋ پروۆينتسياسىنداعى ۇلتتىق قاۋىپسىزدىك اگەنتتىگىنىڭ قىزمەتكەرلەرى چا روڭ، چاي مىڭ جانە باسقالاردىڭ اتى اتالعان. سونىمەن قاتار، قىتايلىق بارلاۋ قىزمەتكەرلەرى جانە ولاردىڭ جالداعان حاكەرلەرى مەن ينسايدەرلەرى بىرنەشە جىل بويى اسا ماڭىزدى اۋە كومپانياسىنىڭ قۇپيالارىن ۇرلاۋمەن اينالىسقانى ايتىلعان.

مالىمدەمەدە ايتىلۋىنشا، 2010 جىلى قاڭتاردان باستاپ، 2015 جىلى مامىرعا دەيىن، جياڭسۋ ۇلتتىق قاۋىپسىزدىك اگەنتتىگىنىڭ بارلاۋ قىزمەتكەرلەرى مەن ونىڭ حاكەرلەر توبى جاڭ جاڭگۇي، لب چۋانلياڭ، گاۋ حوڭكۇڭ، جۋاڭ شياۋي ما جىچي قاتارلىلاردى قامتىعان امەريكالىق جانە ەۋروپالىق كوممەرتسيالىق اۆياكومپانيالار پايدالاناتىن تۋربوان قوزعالتقىشىنىڭ نەگىزگى تەحنولوگياسىن ۇرلاۋعا ارەكەت ەتكەن. مالىمەتتەرگە قاراعاندا، بۇل قوزعالتقىشتى قىتايدىڭ سۋجۋ قالاسىندا ورنالاسقان فرانتسيا مەن اقش بىرلەسكەن كومپانيالارى زەرتتەپ وندىرگەن.

قازىر فەدەرالدىق بارلاۋ اگەنتتىگى مەن ادىلەت دەپارتامەنتى جانە مەملەكەتتىك دەپارتامەنتتەرى قىتايلىق بارلاۋ قىزمەتكەرلەرىنىڭ ارەكەتتەرىنە قارسى شارالاردى دايىنداۋدا.

  “The Qazaq Times”