ال-فارابي اتىنداعى قازۇۋ-دا «رۋحاني جاڭعىرۋ» باعدارلاماسى اياسىندا «جاستار كوكپار ليگاسى» مەن قازۇۋ-دىڭ ۇيىمداستىرۋىمەن ۇلتتىق سپورتىمىزدى دامىتۋ ماقساتىندا «JKL PROFI 3x3» فورماتىندا كاسىبي كوكپار كوماندالارى اراسىندا تارتىستى كوكپار ويىنى ءوتتى.

اتالمىش تارتىستى ويىندى تاماشالاۋعا قازۇۋ رەكتورى ع. مۇتانوۆ، تۇركى دۇنيەسى جۋرناليستەر فەدەراتسياسىنىڭ پرەزيدەنتى مەندەرەس دەمير مىرزا مەن تۇرىك دەلەگاتسياسى، جانە دە «جاستار كوكپار ليگا» كەڭەسىنىڭ پرەزيدەنتى دانيار داۋكەي مەن ۇلتتىق سپورتىمىزدىڭ جاناشىرلارى جينالدى.

تۇركى دۇنيەسى جۋرناليستەر فەدەراتسياسىنىڭ پرەزيدەنتى مەندەرەس دەمير مىرزا ءوز كەزەگىندە قازاقستاندا ۇلتتىق سپورتتىڭ قارىشتاپ دامىپ كەلە جاتقاندىعىنا ءوز ريزاشىلىعىن ءبىلدىردى. «مەن سىزدەردىڭ وقۋ ورىندارىڭىزدى ارالاۋ بارىسىندا قانشالىقتى حالىقارالىق دەڭگەيدە دامىپ كەلە جاتقاندىعىنا كۋا بولدىم. قازۇۋ الەمنىڭ 250 ۇزدىك ۋنيۆەرسيتەتىنىڭ قاتارىنا ەنىپ، الەم الدىنداعى بەدەلى قارىشتاپ دامىپ كەلەدى. ءبىلىم مەن عىلىمدى دامىتۋمەن قاتار ءوز داستۇرلەرىڭىزگە دە قانشالىقتى بەرىك ەكەندەرىڭىزگە بۇگىنگى كوكپار ويىنى دالەل. كوكپار بۇل تۇركىتىلدەس ەلدەرگە ورتاق ۇلتتىق ويىن، وكىنىشكە وراي ارامىزدان جىل ساناپ ۇمىت بولىپ بارادى. وسى ورايدا مەن قازاق جاستارىنىڭ وسى ۇلتتىق سپورتقا دەگەن ەرەكشە ماحابباتتارىن كورىپ، وزىمىزگە ۇلگى رەتىندە الىپ وتىرمىن. الداعى ۋاقىتا كوكپار ويىنىن تۇركيادا، ەۆروپادا، ءتىپتى بۇكىل الەمگە جارنامالاپ، قايتا جاڭعىرتۋ جولىندا بەلسەنە جۇمىس اتقارۋعا دايىن ەكەنىمىزدى جەتكىزگىم كەلەدى»، – دەدى مەندەرەس دەمير.

جالپى «JKL PROFI 3x3» فورماتى كوكپاردى قالالىق جەرلەردە دامىتۋعا وتە وڭتايلى فورمات بولىپ سانالادى. ياعني بۇل فورماتتا ويىن وتكىزۋ الاڭ اۋماعىنىڭ كىشى جانە كوكپارشىلار سانىنىڭ ازدىعىن كەدەرگى سانامايدى، بۇل فورمات ەلىمىزدە كەڭ تارالۋدا.

پەريزات جارىلقاسىنوۆا

"The Qazaq Times"