الماتىدا الەمگە ايگىلى جارناماشى دجەيمس حيورمەننىڭ «ارگۋمەنت ۆ پولزۋ كرەاتيۆنوستي» اتتى كىتابىنىنىڭ العاش رەت ورىس تىلىندەگى نۇسقاسى تانىستىرىلدى. بۇل اتالمىش كىتاپتىڭ العاش رەت ورىس تىلىندە جارىق كورۋى. ول شىعارماشىلىق تۇرعىدا قازىرگى زامانعى ىسكەرلىك باسىلىمدار ءۇشىن وتە ماڭىزدى بولىپ سانالادى. سونداي -اق، اۆتور كرەاتيۆتىلىك پەن تيىمدىلىككە قاتىستى پىكىرتالاسقا نۇكتە قويادى. بۇل كىتاپتا الەمدىك ءىرى كومپانيالاردىڭ وكىلدەرى وسى تاقىرىپ جايىندا تەرەڭ تالداۋ جاساپ، ستاتيستيكاعا نەگىزدەلگەن ءوز تۇجىرىمدارىمەن بولىسەدى.

BigWonReport ەسەبى بويىنشا، كىتاپتىڭ اۆتورى دجەيمس حيورمەن الەمدەگى №1 جوسپارلاۋ ديرەكتورى. ول 20 «كانن ارىستاندارى» جۇلدەسى مەن تيىمدىلىگى ءۇشىن 50-دەن استام جۇلدەنىڭ يەسى. اۆتور 30 جىلدىق تاجىريبەسىنە سۇيەنە وتىرىپ، كرەاتيۆتىلىك پەن تيىمدىلىكتىڭ، كرەاتيۆتىلىك پەن كومپانيا تابىسىنىڭ ءوسۋى، كرەاتيۆتىلىك پەن اكتسيا باعاسىنىڭ ءوسۋى ءبىر-بىرىمەن تىكەلەي بايلانىستى ەكەنىن دالەلدەيدى. ول بۇل كىتابىمەن حالىقارالىق بيزنەس سالاسىندا سىلكىنىس جاسادى.

اتالعان كىتاپتى قازاقستاندا ورىس تىلىنە اۋدارىپ، باسىپ شىعارۋ يدەياسىنىڭ اۆتورى - «ا-3 پراكتيكالىق جارناما مەكتەبىنىڭ» نەگىزىن قالاۋشى جانە كانن ارىستاندارى حالىقارالىق كرەاتيۆ  فەستيۆالىنىڭ قازاقستانداعى ەكسكليۋزيۆتى رەسمي وكىلى اسحات وسكەمباەۆ. ونىڭ ايتۋىنشا، اۆتورمەن كەلىسىمگە كەلۋ ول ويلاعاننان دا وڭاي بولعان.

"مەن بۇل كىتاپپەن العاش رەت كانن ارىستاندارى حالىقارالىق فەستيۆالىنە بارعاندا تانىستىم. نەگە ورىس تىلىنە اۋدارىپ، قازاقستاندا باسىپ شىعارماسقا دەگەن وي كەلدى. اۆتورمەن حابارلاستىم، ونىمەن كەلىسۋ مەن ويلاعاننان دا جەڭىل بولدى، ون بەس-اق مينۋتتا كەلىسىمگە كەلدىك. ونى اۋدارۋعا ءبىر جارىم اي، ال باسىپ شىعارۋ ءۇشىن ەكى ايدان ارتىق ۋاقىت جۇمسالدى. جالپى، جىل سايىن جارناماعا ميلليونداعان قارجى بولىنەدى، الايدا كرەاتيۆ بولماسا، ول اقشا بوسقا كەتتى دەگەن ءسوز. ءبىز ەكونوميكامىزدىڭ دامۋىنا ۇلەس قوسپايمىز، ال دەۆالۆاتسيا، دوللاردىڭ كوتەرىلۋى سىندى ماسەلەلەردى ايتىپ شاعىمدانۋعا كەلگەندە الدىمىزعا جان سالمايمىز. سوندىقتان كرەاتيۆتى بولۋعا ۇمتىلۋىمىز كەرەك. قازاقستان ءۇشىن كرەاتيۆتى بولۋ - ءومىر ءسۇرۋ ساپاسىن جاقسارتۋ بوپ سانالادى. ءارى قاراي العا جىلجىپ، تابىستى بولعىسى كەلەتىندەر ءۇشىن بۇل تاپتىرماس كىتاپ", - دەدى اسحات وسكەمباەۆ.

كىتاپتىڭ اۋدارماسىمەن بەلگىلى اۋدارماشى، جارناما الەمىندە ۇلكەن تاجىريبەسى بار اناستاسيا گونچاروۆا اينالىسقان. ول ءوز كەزەگىندە كىتاپتاعى ماڭىزدى اقپاراتتاردى قاراپايىم تۇسىنىكتى تىلدە جەتكىزۋگە تىرىسقانىن اتاپ ءوتتى.

جالپى، «كانن ارىستاندارى» حالىقارالىق كرەاتيۆ فەستيۆالى (International Festival Of Creativity Cannes Lions) كوممۋنيكاتسيالىق يندۋستريا سالاسىنداعى بەدەلدى حالىقارالىق فەستيۆال سانالادى. جىل سايىن ول فرانتسيانىڭ كانن قالاسىندا وتەدى، مۇندا كونكۋرستىق باعدارلامادان بولەك، سەمينارلار، وقۋ كۋرستارى مەن بايلانىس سالاسىنىڭ قىزمەتكەرلەرى ءۇشىن قوعامدىق ءىس-شارالار وتەدى. ال ونىڭ باستى وقيعاسى كوممەرتسيالىق جانە الەۋمەتتىك بايلانىس سالاسىنداعى جىلدىڭ ۇزدىك جۇمىستارىن ماراپاتتاۋ («ارىستاندار») سالتاناتتى شاراسى سانالادى.

فەستيۆالدا جارنامالىق كامپانيالار ءۇشىن دە، تەحنيكالىق سالاداعى جەتىستىكتەر ءۇشىن دە دارەجە بار. ەكى جاعداي دا «التىن ارىستان» (Gold Lion) جۇلدەسى ءوز دارەجەسىنىڭ ۇزدىك قاتىسۋشىسىنا بەرىلەدى.

"The Qazaq Times"