قىتاي اقش-پەن قاۋىپسىزدىك كەلىسسوزىن وتكىزۋدەن باس تارتتى

اقش-تىڭ جوعارى لاۋازىمدىلارىنىڭ ءبىرى جەكسەنبى كۇنى باق-قا بەرگەن مالىمەتىندە، قىتاي ۇكىمەتى اقش قورعانىس ءمينيسترى جەيمس مەتتيسپەن كەلىسسوز وتكىزۋدەن باس تارتقانىن ايتتى. بۇل تۋرالى The New York Times باسىلىمى حابارلاعان بولاتىن.

ءوزىنىڭ لاۋازىمى مەن اتى-ءجونىن بىلدىرگىسى كەلمەگەن اقش-تىڭ قىتاي ىسىنە بايلانىستى لاۋازىمدىسىنىڭ ايتۋىنشا، قازىرگە دەيىن تاراپتار كەلىسسوزدى باسقا ۋاقىتقا ورنالاستىرۋ تۋرالى قانداي دا ءبىر كەلىسىمگە دە كەلمەگەن.

بۇل تۋرالى ءوز ساراپتاماسىندا The New York Times باسىلىمى: «قىتايدىڭ بۇل كەلىسسوزدەن باس تارتۋى اقش-قىتاي اراسىندا كوپتەگەن ماسەلەلەردە قايشىلىق ءورشىپ تۇرعانىن تۇسىندىرەدى. ايتالىق، قۇراما شتاتتىڭ تايۆانعا قارۋ-جاراق ساتىپ بەرەتىنى، وڭتۇستىك قىتاي تەڭىزى مەن ونىڭ ماڭىنداعى تەڭىز ايدىندارىنداعى اسكەري قادامداردا ەكى ەل اراسىندا قايشىلىق تىم تەرەڭ كۇيدە قالىپ وتىر»، – دەپ جازدى.

قىتاي لاۋازىمدىلارى بولسا، ەكى ەل اراسىندا وتكەن اپتالارداعى قايشىلىق سالدارىنان كەزەكتى قاۋىپسىزدىك جونىندەگى كەلىسسوز كۇشىن جويعان. قازىر اقش-قىتاي اراسىندا ساۋدا سوعىسى دا ءورشىپ تۇر. ەكى ەل تاريفتەر ارقىلى جاۋاپتاسىپ جاتقانىنا جارتى جىلعا جۋىقتادى. دەگەنمەن، قىتاي ءسىم باسشىسى ۋاڭ ي بولسا، اقش-قىتاي ساۋدا قاقتىعىسىنان الاڭداۋدىڭ كەرەك جوق ەكەنىن ايتادى.

“The Qazaq Times”