يران ءيزرايلدىڭ «قۇپيا اتوم قويماسى» تۋرالى ايىپتاۋىنا جاۋاپ بەردى

يران "يزرايل ءوزىنىڭ يادرولىق قارۋ-جاراق باعدارلاماسىن شىعاراتىنىن حالىقارالىق ينسپەكتور الدىندا مويىنداۋى كەرەك", - دەپ مالىمدەمە جاساعان. بۇل تۋرالى france24.com/fr حابارلايدى.

يران ءسىم-ءنىڭ بۇنداي مالىمدەمە جاساۋىنا يزرايل پرەمەر-ءمينيسترى بينيامين  نەتانياحۋدىڭ يران استاناسىندا جاسىرىن«اتوم قويماسىنىڭ» تابىلعانى تۋرالى ايتقانى سەبەپ بولعان سياقتى. 27 قىركۇيەكتە بۇۇ باس اسسامبلەياسىنىڭ 73-سەسسياسىندا نەتانياحۋ يراننىڭ تەھراندا ورنالاسقان يادرولىق قويمانى جاسىرىپ وتىرعانىنا قاتىستى حابارلاعان بولاتىن. نەتانياحۋ ءوزى ايتقان «قۇپيا اتوم قويماسىنىڭ» ورنالاسقان ورنى كورسەتىلگەن كارتا مەن سۋرەتتەردى دە ۇسىندى. سونىمەن قاتار، ول ءيزرايلدىڭ وسى اقپاراتتاردى اتوم ەنەرياسى جونىندەگى حالىقارالىق اگەنت (ماگاتە) پەن وزگە ەلدەردىڭ ارنايى قىزمەتتەرىنە بەرەتىنىن ايتىپ، ماگاتە ينسپەكتورلارىن اتالعان ايماقتا زەرتتەۋ جۇرگىزۋگە شاقىرعان بولاتىن. ونىڭ بايانداماسىندا يران جاعىنىڭ جالپى سالماعى 300 تونناعا جەتەتىن كەم دەگەندە 15 جۇك كونتەينەرىن ساقتاپ وتىرعانى ايتىلعان.

يزرايل پرەمەر-ءمينيسترى بينيامين نەتانياحۋ

ال، يران ءسىم باسشىسى زاريف: «يزرايل — ءبىزدىڭ ايماقتاعى «ناعىز يادرولىق ارسەنالىمەن» قوسا، «قۇپيا» جانە «جاريالانباعان»  يادرولىق باعدارلاماعا يە بىردەن ءبىر رەجيم. يزرايلگە ءوزىنىڭ يادرولىق زاڭسىز باعدارلاماسىن حالىقارالىق ينسپەكتور الدىندا مويىندايتىن كەزى كەلدى»، - دەپ حابارلادى.

ايتا كەتۋ كەرەك، ءيزرايلدىڭ يراننىڭ استىرتىن يادرولىق قويماسى تۋرالى مالىمدەمە جاساعانى ءبىر بۇل ەمەس. بۇعان دەيىن دە نەتانياحۋ ءيزرايلدىڭ قولىندا يراننىڭ "بەتپەردەسىن" اشىپ بەرۋ ءۇشىن جەتكىلىكتى 100 مىڭ قۇپيا قۇجات بار ەكەنىن، تەھراننىڭ يادرولىق باعدارلاماسىنا قاتىستى شىندىقتى جاسىراتىنىن حابارلاعان ەدى. ەندى، 27 قىركۇيەكتە وتكەن بۇۇ باس اسسامبلەسىنىڭ 73-سەسسياسىندا نەتانياحۋ يراننىڭ يراننىڭ استىرتىن قويماسى بار ەكەنىن ايتا كەلىپ، يادرولىق باعدارلاماسى دەپ تە اتالاتىن "ورتاق قادام" جان-جاقتى كەلىسىمشارتىنا مۇشە ەلدەردى وسى وداقتان باس تارتۋعا شاقىردى. الايدا، يراننىڭ يادرولىق باعدارلاماسىنا قاتىسۋشى ەلدەر نەتانياحۋدىڭ مالىمدەمەسىنە بىردەن جاۋاپ بەردى. ولار يراننىڭ اتالعان كەلىسىمشارتتىڭ قاعيدالارىن قاتاڭ ساقتاپ وتىرعانىن مالىمدەدى. ماگاتە-ءنىڭ دە ءدال وسىنداي تۇجىرىمداما جاساعانىنان ءيزرايلدىڭ يرانعا قاتىستى قانشا دالەلى بولعانىنا قاراماستان، ءسوزى وتپەگەنىن اڭعارۋعا بولاتىنداي.

“The Qazaq Times”