ترامپ: رۋحاني كەرەمەت ادام، بىراق ونىمەن جاقىن ارادا كەزدەسەتىن ويىم جوق

اقش پرەزيدەنتى دونالد ترامپ يران يسلام رەسپۋبليكاسىنىڭ پرەزيدەنتى حاسان رۋحانيمەن جاقىن كۇندەرى كەزدەسۋ نيەتى جوق ەكەنىن مالىمدەدى. ول بۇل تۋرالى تۆيتتەر الەۋمەتتىك جەلىسىندەگى پاراقشاسىندا جاريالادى.

«وتىنىشىنە قاراماستان، يران پرەزيدەنتى حاسان رۋحانيمەن كەزدەسەتىن ويىم جوق. مۇمكىن، كەيىن ايتەۋىر ءبىر ۋاقىتتا كەزدەسىپ قالارمىز. بىراق، مەن ونىڭ وتە كەرەمەت ادام ەكەنىنە سەنىمدىمىن»، - دەپ جازعان ترامپ.

بۇدان بۇرىن ءرۋحانيدىڭ ءوزى اقش باسشىسىمەن كەزدەسۋدىڭ مۇمكىن ەمەستىگىن ايتقان ەدى. سونىمەن قاتار، رۋحاني احۆاز قالاسىنداعى تەراكتىدەن كەيىن يرانعا «ايناعا قاراۋعا» كەڭەس بەرگەن اقش-تىڭ بۇۇ-عى تۇراقتى وكىلى نيككي حەيليدىڭ پىكىرىنە تەرىس جاۋاپ قايتارىپ، يراننىڭ مۇناي ساتۋ ىسىنەن ايىرۋدىڭ مۇمكىن ەمەستىگىن دە ايتقان بولاتىن.

“The Qazaq Times”