قازاق بوكسشىسى كاسىپقوي بوكستان الەم چەمپيونى اتاندى

بۇل بوكس دوداسى امەريكانىڭ تولەدو قالاسىندا ءوتتى. سايىس وڭاي بولعان جوق. 12 راۋندقا سوزىلدى. شايقاس مايدانىنىڭ باس كەيىپكەرلەرى – قازاقستاننىڭ كاسىپقوي بوكسشىسى جانات جاقيانوۆ (26-1, 18كو) پەن امەريكالىق روۋشي ۋوررەن (14-1, 4كو). ەكەۋىنىڭ تالاسىپ جۇرگەنى  – جەڭىل سالماقتاعى WBA (Super) جانە IBO كاتەگوريياسى بويىنشا الەم چەمپيونى بەلدىگى.

سايىستىڭ بارىسى تۋرالى ايتا كەتسەك، العاشىندا امەريكالىق بىلعارى قولعاپ شەبەرىنىڭ ارىنى باسىم بولىپتى. ءبىرىنشى كەزدەسۋدە قازاق بوكسشىسىن ءسۇرىندىرىپ، ءتىپتى نوكداۋنعا ءتۇسىرىپ جىبەردى. بىراق، قايسار قازاق سپورتشىسىنىڭ وعان بەتى قايتقان جوق، ەكىنشى مايداننان باستاپ، ىرىقتى ءوز قولىنا الا باستادى. سول ەڭسەرگەننەن قايتىپ باس كوتەرتكەن جوق، ءۇستى-ۇستىنە اۋىر سوققىنىڭ استىنا الا بەردى. 12 راۋندتىڭ سوڭىنا شىققانشا قازاق بوكسشىسى قارسىلاسىن ابدەن سىلكپەلەدى. سوڭىندا، روۋشي ۋوررەن راسىن ايتتى. نەشە رەت سەندەلەكتەپ، بۇكتەتىلىپ وتىرىپ تا قالدى. ايتسە دە، ول دا وڭاي شاعىلمايدى ەكەن، ويىننىڭ اياعىنا دەيىپ شىدادى ايتەۋىر. بىراق، تورەشىلەر جەڭىستى قازاق بوكسشىسى – جانات جاقيانوۆقا بەردى.

ءسويتىپ، جانات ءوزىنىڭ كاسىپقوي بوكستاعى 27 كەزدەسۋىن جەڭىسپەن اياقتاپ، جەڭىل سالماقتاعى WBA (Super) جانە IBO تۇجىرىمى بويىنشا الەم چەمپيونى اتاندى.

ەندى، اتى الەمگە تانىلا باستاعان قازاق باتىرى، كاسىپقوي بوكسشى جانات جاقيانوۆ جايلى از مالىمەت ايتا كەتەيىك. جانات – قىزىلجار ءوڭىرىنىڭ تۋماسى. وسىعان دەيىن كاىسپقوي بوكس الاڭدارىندا ونەر كورسەتىپ جۇرگەنىمەن، ول حالىققا ونشا تانىمال ەمەس-ءتىن. مۇمكىن، وليمپيادا ويىندارىنا قاتىسپاعانىنان دا بولار.

جانات جاقيانوۆ كاسىپقوي بوكسقا 2007 جىلى كەلگەنىمەن، العاشقى اۋقىمدى جەڭىسىنە 2015 جىلى قول جەتكىزدى. ول WBA تۇجىرىمى بويىنشا، مونتە-كارلودا وتكەن 12 راۋندتىق جەكپە-جەكتەتە جەڭىل سالماقتاعى ۋاقىتشا الەم چەمپيونى بەلدىگىنە قول جەتكىزدى. سول جىلى تاعى دا ءساتتى ونەر كورسەتىپ، EBU تۇجىرىمى بويىنشا جەڭىل سالماقتا ەۋروپا چەمپيونى اتاعىن جەڭىپ العان.

قازىرگە دەيىن وتكىزگەن 26 كەزدەسۋىنىڭ 25-ىندە جەڭىسكە قول جەتكىزىپتى. ونىڭ 18 كەزدەسۋىن ۋاقىتىنان بۇرىن اياقتاعان. 2015 جىلدىڭ سوڭىنا قاراي جاراقات الىپ، ءبىر جىلدان استام ەمدەلگەن جانات، ەندى مىنە جاڭا جەڭىسىنە قول جەتكىزدى. ZZ دەگەن جاناما اتپەن بوكس الاڭدارىن باعىندىرىپ جۇرگەن جانات، كاسىپقوي بوكستا گ.گولوۆكيننەن كەيىنگى قازاق سپورتشىلارى اراسىنداعى ەكىنشى چەمپونىمىز بولىپ وتىر.

قازاق بوكسشىسى جانات جاقيانوۆتىڭ الداعى كەزدەسۋلەرىنە دە ۇلكەن تابىس تىلەيمىز!