ەۋرووداق اقش پەن قىتاي اراسىنداعى ساۋدا سوعىسىنا بولا دسۇ-ىن رەفورمالاماق

الەمنىڭ الىپ ەلدەرىنىڭ اراسىنداعى ساۋدا كەلىسپەۋشىلىگىنىڭ، ياعني ساۋدا سوعىسىنىڭ دۇنيەجۇزىلىك ساۋداعا تىكەلەي اسەر ەتۋى دسۇ-نىڭ جالپى قۇرىلىسىنىڭ وزگەرتىلۋىنە دەيىن اسەر ەتىپ وتىر. ەۋروپا وداعى اقش پەن قىتاي تاۋارلارىنا سالىنعان سالىقتىڭ ارتۋىنا بايلانىستى دۇنيەجۇزىلىك ساۋدا ۇيىمىن رەفورمالاۋعا نيەتتى. بۇل تۋرالى وداقتىڭ رەسمي مالىمدەمەسىنە سىلتەمە جاساپ «24heures.ch» حابارلايدى.

ەۋرووداق وكىلدەرىنىڭ حابارلاۋىنشا، 2018 جىلدىڭ قىركۇيەگىندە بريۋسسەلدە ەو، اقش جانە جاپونيانىڭ ساۋدا مينيسترلەرىنىڭ قاتىسۋىمەن كەلىسسوزدەر جۇرگىزىلمەك. وسى كەزدەسۋدەن كەيىن ەۋرووداق اتالعان ۇيىمنىڭ رەفورماسىنا قاتىستى جوسپارلارىن ۇسىنباق. ساراپشىلاردىڭ مالىمەتىنشە، وندا ساۋدا شىعىندارىن قىسقارتۋ جانە دسۇ-داعى داۋ-تارتىستاردى رەتتەۋ جۇيەسىن قالاي جاساۋ كەرەكتىگى، سونىمەن قاتار، ۇيىمنىڭ جۇمىسىن جاقسارتۋ نازارعا الىنباق. نەگىزى، وتكەن ايدا دا ۇيىم باسشىسى روبەرتو ازەۆەدو ۇيىمداعى جاعدايعا بايلانىستى كەلىسسوزدەر وتكىزىلۋى تۋرالى حابارلاپ: «جاعداي وتە قيىن. الەمدىك كوپتەگەن ليدەرلەر دۇنيەجۇزىلىك ساۋدا ۇيىمى اياسىندا كەلىسسوزدەر وتكىزىپ، ءبىر شەشىم تابۋ كەرەكتىگىن الدەقاشان ءتۇسىندى»، - دەگەن.

ەۋروپا كوميسسياسى وتكەن ايدا، ياعني، 5 شىلدەدە ۇيىمنىڭ ساۋدا ساياساتى جونىندەگى كوميتەتىنە قول قويىلعان قۇجات جولداعان ەدى. ول قۇجات دسۇ-نىڭ جۇمىس ەرەجەلەرى مەن قۇرىلىمدارىن جاقسارتۋ بويىنشا ۇسىنىستاردى قامتىعان.

“The Qazaq Times”