2018 جىلعى تامىزدىڭ 20-ى مەن 25-ءى ارالىعىندا قاراعاندى وبلىسىنىڭ «سپاسسك» وقۋ-جاتتىعۋ ورتالىعىنىڭ بازاسىندا «التىن ۇكى – 2018» VIII حالىقارالىق مەرگەندەر سايىسى وتەدى. بۇل تۋرالى قر قورعانىس مينيسترلىگى رەسمي حابارلادى. 

«التىن ۇكى» كۋبوگىنا الەمنىڭ 11 ەلىنەن، ايتالىق – اۋعانستان، بەلورۋسسيا، بەلگيا، ۇلىبريتانيا، ءۇندىستان، يتاليا، قىتاي، قىرعىزستان، قازاقستان، پاكىستان، رەسەيدىڭ مەرگەندەرى باق سىناسادى.  باقىلاۋشىلار رەتىندە سايىسقا  امەريكا قۇراما شتاتتارى، بىرىككەن اراب امىرلىكتەرى، وڭتۇستىك كورەيا مەن تۇركيانىڭ وكىلدەرى قاتىسادى. بەس كۇن بويى مەرگەندەر ءارتۇرلى قاشىقتىقتان، جىلدامدىقتان، ءارتۇرلى نىسانالار بويىنشا وق اتۋدان، كۇندىزگى جانە تۇنگى ۋاقىتتا ءجۇرىپ وتكەن جەرلەرىن باعدارلاۋ بويىنشا  باسەكەگە تۇسەدى.

«التىن ۇكى» حالىقارالىق سايىسى 2008 جىلدان باستاپ وتكىزىلىپ كەلەدى. اتالعان ەلدەردىڭ اراسىندا سايىسقا العاش رەت قاتىسقالى وتىرعاندارى دا بار. سايىستى جوسپارلاۋ مەن ۇيىمداستىرۋ كەزىندە اقش، يوردانيا، بەلورۋسسيا، رەسەي جانە الەمنىڭ وزگە ەلدەرىنىڭ مەرگەندەر سايىسىنا بىرنەشە مارتە قاتىسقان قازاقستاندىق سۇرمەرگەندەردىڭ  تاجىريبەسى ەسكەرىلدى. مەرگەندەر ونەرىنىڭ ازيالىق فورۋمى اياسىندا وتكىزىلەتىن «التىن ۇكى» كۋبوگىنىڭ ويناتىلۋى مىقتى كاسىبي بايلانىس ورناتۋ جانە سايىس قاتىسۋشىلارى اراسىندا تاجىريبە الماسۋ مىندەتتەرىن جۇكتەيدى.

“The Qazaq Times”