ەردوعان اقش-تى حالىقارالىق قۇقىقتى بۇزباۋعا شاقىردى

تۇركيا پرەزيدەنتى رەجەپ تايىپ ەردوعان جەكسەنبى، 12 تامىز كۇنى اق ءۇي بيلىگىن حالىقارالىق قۇقىق نورمالارىن اياق استى ەتپەۋگە شاقىردى. «تۇركيا قاشان دا حالىقارالىق قۇقىق ەرەجەلەرىن بۇزباۋعا تىرىسادى. اقش-تىڭ وسى زاڭدىلىقتاردى اياق استى ەتۋى تۇسىنىكسىز. ءبىز اقش-تى قۇقىقتىق ارەكەتتەن اسپاۋعا شاقىرامىز»، - دەپ مالىمدەگەن ر.ت.ەردوعان. بۇل تۋرالى «انادولى» اگەنتتىگى پرەزيدەنتتىڭ ءباسپاسوز قىزمەتىنە سىلتەمە جاساپ حابارلايدى.

ەردوعان اقش-تىڭ «فەتو» ۇيىمىنا قاتىسى بار دەپ كىنا ارتىلعان امەريكالىق پاستور ەندريۋ برانسوندى تۇرىك ۇكىمەتىنە قارسى سانكتسيا ەنگىزۋ جانە قارجىلىق جۇيەنى تۇراقسىزداندىرۋ، سونداي-اق، تۇركيادان شىعارىلاتىن ونىمدەرگە سالىق ەنگىزۋ جولىمەن بوستاندىققا شىعارتۋعا تىرىسقان ارەكەتىن كەشىرىلمەيتىن قىلىق دەپ سانايدى.

بۇعان دەيىن دە، رەجەپ تايىپ ەردوعاننىڭ اقش-تىڭ وسى ارەكەتىنە ءۇنسىز قالا المايتىنىن ايتقانى تۋرالى دا جازعان ەدىك. ەندى، بۇگىن تۇرىك پرەزيدەنتى تۇركيانىڭ اليۋميني مەن مەتاللعا سالىنعان امەريكالىق سالىققا جاۋاپ رەتىندە ءتيىستى تۇردە جاۋاپ قايتارىپ، «اقش-تىڭ ارەكەتىنە قارسى باسقا اليانستار مەن نارىققا بەت بۇراتىنىن» مالىمدەدى.

وسىدان بۇرىن، اقش پرەزيدەنتى دونالد ترامپ تۇركيالىق ەكى بىردەي ءمينيستردىڭ اكتيۆتەرىن بۇعاتتاپ، سانكتسيا سالىپ, ارتىنشا، 10 تامىزدا تۇركيادان وندىرىلەتىن بولات پەن اليۋميني يمپورتىنا 20% جانە 50% كولەمىندە سالىق ەنگىزەتىنىن حابارلاعان ەدى. بۇل جاعداي تۇرىك ليراسىنىڭ كۇرت تومەندەۋىنە اكەپ سوعۋدا.

ەكى ەل اراسىنداعى ساياسي تارتىستىڭ شيەلەنىسكەنى سونشا، ەندى اقش تاراپى تۇركيانىڭ ارمياندار گەنوتسيدىن مويىنداۋعا شاقىرۋدا. وسىنداي مالىمدەمەنى كونگرەسسمەن-دەموكرات، ساياساتكەر تەد ليۋ ءوزىنىڭ twitter پاراقشاسىندا جاريالادى.

«تۇركيا اۆتوريتاريزمگە ۇمتىلادى. سول ۇمتىلىسى ارقىلى امەريكالىقتارعا قارسى ۇستانىمعا يە بولۋدا. ءبىزدىڭ كوپشىلىگىمىز پرەزيدەنتتى تۇركيانىڭ ارميان گەنوتسيدىن مويىنداۋعا شاقىردىق. مەن ەندى، ترامپتىڭ وسىنى قولعا الۋىن سۇرايمىن. اقش ەندى، تاريحي دەرەكتەردى جوققا شىعارا المايدى»، - دەپ جازعان.

“The Qazaq Times”