فوتو: كورنەكى سۋرەت

گەرمانيانىڭ ىشكى ىستەر مينيسترلىگىنىڭ ءباسپاسوز قىزمەتى كەشە، 8 تامىز كۇنى  گەرمانيا فەدەراتيۆتى رەسپۋبليكاسىنا (گفر) كەلۋشى كەيبىر بوسقىنداردى قايتارۋ تۋرالى يسپانيامەن كەلىسىمشارتقا قول قويىلعانىن حابارلادى. بۇل تۋرالى «lemonde.fr» جازدى.

اتالعان حابارلاماعا قاراعاندا، كەلىسىمشارت دۇيسەنبى كۇنى گەرمانيا مەن يسپانيانىڭ  سىرتقى ىستەر مينيسترلەرى تاراپىنان جاسالعان. ەندى، 11 تامىزدا كۇشىنە ەنبەك. بىراق، ول يسپانيادا بوسقىن رەتىندە تىركەلگەندەرگە عانا جارامدى. وسى كەلىسىمشارتقا سايكەس، بوسقىندار گەرمانياعا كەلگەننەن كەيىن 48 ساعاتتىڭ ىشىندە كەرى قايتارىلۋى كەرەك.  ايتا كەتەتىن جايت، بۇل — بوسقىندار ىسىنە قاتىستى ەۋروپادا جاسالعان العاشقى كەلىسىمشارت. سونىمەن قاتار، گەرمانيانىڭ ىشكى ىستەر ءمينيسترى حورست زەەحوفەر ەۋروپالىق وزگە دە ەلدەرمەن وسىنداي كەلىسىمشارت جاساۋعا دايىن ەكەندىكتەرىن مالىمدەدى.

نەگىزى، ەۋروپا وداعىنىڭ (ەو) ەرەجەسىنە ساي، ەو شەكاراسىنان تىس ايماقتاردان ەۋروپاعا كەلۋشى بوسقىندار ەلگە كەلە سالىسىمەن تىركەۋدەن وتۋلەرى ءتيىس. سەبەبى، ولاردىڭ باسساۋعا الۋلارى ءۇشىن جاساعان وتىنىشتەرى قاراستىرىلۋى كەرەك. تاعى ايتا كەتەتىن جايت، وسى جىلى بوسقىنداردىڭ كوپشىلىگى سولتۇستىك افريكا مەن ەۋروپاعا يسپانيا ارقىلى كەتۋدە.

ەسكە سالايىق، ەۋروپالىق كوميسسيا بوسقىندار داعدارىسىن شەشۋ ءۇشىن يسپانياعا توتەنشە كومەك كورسەتۋ ماقساتىندا 3 ملن ەۋرو بولگەن ەدى. بۇل كومەك يسپانيانىڭ ازاماتتىق گۆارديانىڭ قوسىمشا كۇشتەرىن ەلدىڭ وڭتۇستىك شەكاراسىنا ورنالاستىرۋعا كەتەتىن شىعىندارعا باعىتتالماق.

افريكا ەلدەرىندەگى الەۋمەتتىك جاعدايعا بايلانىستى، سونىمەن قاتار، تاياۋ شىعىس ەلدەرىندەگى ازاماتتىق سوعىستار مەن تەررورلىق قاقتىعىستاردىڭ سالدارىنان ءۇي-جايلارىن تاستاپ كەتۋشى بوسقىندار كوبىنە-كوپ ەۋروپانىڭ ەسىگىن قاعاتىنى ەندىگى، بارىمىزگە بەلگىلى جاعدايعا اينالدى. وسىنداي ماسەلەلەرمەن بەتپە-بەت قالعان ەو وعان مۇشە-مەملەكەتتەرگە بولىنەتىن قارجىلىق كومەكتەرىن ەسەلەۋدە. ماسەلەن، بۇدان بۇرىن دا ەۋروپا وداعى بوسقىندار ماسەلەسىن شەشۋ ءۇشىن يسپانيا مەن گرەكياعا 45,6 ملن ەۋرو بولگەن ەدى. كەيىن بەلگىلى بولعانداي، ەلگە كەلۋشى بوسقىندار سانىنىڭ كوپتىگىنە بايلانىستى يسپانيا 25,6 ملن ەۋرو، ياعني اتالعان قارجىنىڭ باسىم بولىگىن يەلەنگەن. سونىمەن قاتار، 29 ماۋسىمدا ەۋروپا ەلدەرى ورتاق مالىمدەمە جاساعان بولاتىن. وندا گرەكيا مەن يسپانيا تەرريتوريالارىنا، اسىرەسە، بوسقىندارعا ارنالعان لاگەرلەر كوپتەپ شوعىرلانعان ەگەي ارالدارىنىڭ ماڭىنا كومەك كەرەك ەكەنى ايتىلىپ، دابىل قاعىلعان.

بوسقىندار ماسەلەسىنە قاتىستى ەۋروپادا مەملەكەتارالىق كيكىلجىڭدەردىڭ ءجيى باس كوتەرەتىنىن ەسكەرسەك، وسىنداي ءوزارا كەلىسىمشارتتار بۇل ماسەلەنىڭ جۇگىن جەڭىلدەتۋگە كومەكتەسەتىندەي.

“The Qazaq Times”