يران ورتالىق بانكى ۇلتتىق ۆاليۋتانى ساقتاپ قالۋعا تىرىسۋدا

اقش ۇكىمەتىنىڭ يرانعا قاراتقان ەكونوميكالىق سانكتسياسى بۇگىن رەسمي كۇشىنە ەندى. وسىعان بايلانىستى يران ۇكىمەتى ۆاليۋتا ايىرباسىن بارىنشا تەجەپ، دوللاردى ساتىپ الۋدى شەكتەۋدە. بۇل تۋرالى VOA جاڭالىقتار قىزمەتى حابارلادى.

سەيسەنبىدەن باستاپ يران شەتەلگە ساياحات جانە بيزنەس ماقساتىندا شىعاتىن تۇلعالارعا قىزمەت كورسەتۋدە جانە ۆاليۋتا ايىرباسىندا ءوزىنىڭ دەربەس باعامىن قويدى. يراننىڭ ورتالىق بانكى يمپورتتىق پرەپاراتتار سياقتى كۇندەلىكتى قاجەتتىلىكتى دوللارمەن قامتاماسىز ەتۋ ءۇشىن ۇكىمەتتىك سۋبسيديالانعان، ارزان باعامدىق ايىرباس باعامىن ورناتۋدى جولعا قويىپ وتىر.

يراننىڭ ورتالىق بانكى ريالدىڭ قۇنسىزدانۋىن بولدىرماۋ ءۇشىن، وسى جىلدىڭ ءساۋىر ايىندا، ۆاليۋتا باعامىن ءبىر دوللارعا 42 000 ريال دەپ بەلگىلەپ، باسقا ايىرباس باعامىنا تىيىم سالعان ەدى. الايدا، بەيرەسمي ساۋدا الاڭدارىندا يران ريالى قۇنسىزدانۋىن جالعاستىرۋدا. ايتالىق، وتكەن اپتادا 120 مىڭ ريال = 1 $ بولدى.

ءساۋىر ايىنان بەرى قاراي يراندىقتار اقش ۇكىمەتىنىڭ سانكتسياسىنان الاڭداپ، ەل كولەمىندە اقش دوللارىن ساتىپ الۋ ءۇردىسى ارتقان.

“The Qazaq Times”