فوتو: avim.org.tr

اۋعانستان اسكەرى تامىزدىڭ 2-نەن 3-نە قاراعان  ءتۇنى «تاليبان» قوزعالىسىنىڭ تۇرمەسىنەن 61 ادامدى بوساتتى، - دەپ حابارلايدى جەرگىلىكتى «Tolonews» تەلارناسى. بۇل تۋرالى «lci.fr» حابارلايدى.

اۋعانستاننىڭ وڭتۇستىگىندەگى گيلمەند قالاسىنىڭ كادجاكي ايماعىندا جۇرگىزىلگەن وپەراتسيا بارىسىندا 18 ەكسترەميست ءولتىرىلدى دەلىنگەن. سونىمەن قاتار، قۇتقارىلعان ازاماتتاردىڭ كەيبىرەۋىنە اسكەري دارىگەرلىك كومەك قاجەت بولعان. وپەراتسيا كەزىندە تالىبتەردىڭ ەكەۋىنىڭ كوزى جويىلىپ، تاعى جەتەۋى تۇتقىنعا الىنعان، - دەپ حابارلايدى «lci.fr» اگەنتتىگى اۋعانستاننىڭ قورعانىس مينيسترلىگىنە سىلتەمە جاساپ.

ايتا كەتۋ كەرەك، اۋعانستان بيلىگى 7 ماۋسىمدا تالىبتەرمەن ۋاقىتشا ءبىتىم جاساسقان ەدى. كەيىن ول بىرنەشە مارتە ۇزارتىلدى. وسى ۋاقىتشا ءبىتىم كەزىندە اۋعانستان قالالارىندا جارىلىستار ورىن الىپ، 40-تان استام ادام قازا تاۋىپ، جۇزدەگەن ادام اۋىر جاراقات العان.  تالىبتەر 20 ماۋسىم كۇنى باگديس قالاسىنداعى اسكەري بازانى باسىپ الىپ، 30 اسكەريدى ولتىرگەن ەدى. ال، 30 ماۋسىمدا بيلىك «تاليبان» قوزعالىسىمەن ۋاقىتشا ءبىتىمدى توقتاتاتىنى تۋرالى جاريالادى.

“The Qazaq Times”