فوتو: El Pais

ەۋرووداق كەرچەن كوپىرىنىڭ قۇرىلىسىنا قاتىسقان رەسەيلىك التى كومپانياعا سانكتسيا ەنگىزدى. اتالعان شەشىمنىڭ ءماتىنى ەۋرووداقتىڭ رەسمي جۋرنالىندا جاريالاندى، - دەپ حابارلايدى بي-بي-سي اگەنتتىگىنىڭ فرانتسۋز قىزمەتى.

ەۋروپا وداعىنىڭ شەشىمىنە سايكەس، 31 ماۋسىمنان باستاپ ەۋروپالىق سانكتسياعا ەكى بىردەي ءىرى كومپانيا ىلىككەن. ولار — رەسەيلىك وليگارح اركادي روتەنبۋرگكە تيەسىلى پاو موستوترەست (MOEX: MSTT)  پەن جشق قۇرىلىسگازمونتاج (ووو سترويگازمونتاج). ەكى كومپانيادا دا بۇدان بۇرىن امەريكالىق سانكتسيالار تىزىمىنە ەنگىزىلگەن. ەو-نىڭ سانكتسيالارى ەنگىزىلگەن كومپانيالار اراسىندا سانك-پەتەربۋرگتەگى گيپروقۇرىلىسكوپىر اق (او ينستيتۋت گيپروسترويموست), كەمەقۇرىلىس زاۋىتى (او سۋدوسترويتەلنىي زاۆود), قۇرىلىسگازمونتاج كوپىر جشق (ووو سترويگازمونتاج - موست) جانە او ۆاد دا بار.

ەسكە سالايىق، وسى جىلدىڭ 15 مامىر كۇنى رەسەي پرەزيدەنتى ۆلاديمير پۋتين كەرچەن بۇعازىنداعى كوپىردىڭ اشىلۋ سالتاناتىنا قاتىسقان ەدى. رەسەي باسشىسىنىڭ وسى شەشىمى اقش پەن باتىس ەلدەرىنىڭ نارازىلىعىن تۋدىرعان ەدى. وسىعان دەيىن ەۋروداق وكىلى "قىرىمداعى كەرچەن كوپىرىنىڭ اشىلۋى ۋكراينانىڭ ەگەمەندىگى مەن ايماقتىق تۇتاستىعىن بۇزۋ بولىپ سانالادى" دەپ، رەسەيگە قارسى سانكتسيا سالۋى مۇمكىن ەكەنن مالىمدەگەن ەدى. ەندى، كوپىر ءۇشىن باسى داۋعا قالعان رەسەي كومپانيالارىنىڭ قىزمەتتەرى شەكتەلۋدە.

“The Qazaq Times”