يران حالىقارالىق سوتقا اقش-تىڭ ۇستىنەن شاعىم ءتۇسىردى

 16 شىلدە كۇنى  يران بۇۇ-نىڭ حالىقارالىق سوتىنا تەھرانعا (تەگەران) قارسى سانكتسيالاردى قاتاڭداتقانىنا بايلانىستى بىرىككەن شتاتتاردىڭ ۇستىنەن شاعىم ءتۇسىردى. بۇل تۋرالى DW اگەنتتىگى يراننىڭ سىرتقى ىستەر مينيسترلىگىنە سىلتەمە جاساپ حابارلايدى.

يران ءسىم باسشىسى مۇحاممەد دجاۆاد ءزاريفتىڭ سوزىنشە، حالىقارالىق سوتقا شاعىم تۇسىرۋدەى باستى ماقسات — اقش-تى «بىرجاقتى سانكتسيالاردى زاڭسىز تۇردە قايتادان ەنگىزگەنى ءۇشىن» جاۋاپكەرشىلىككە تارتۋ. «يران اقش-تىڭ ديپلوماتيالىق قاتىناستارى مەن قۇقىقتىق مىندەتتەرىنە قاراماستان زاڭعا قۇرمەت كورسەتەدى»، - دەگەن د.زاريف. 2015 جىلعى يراننىڭ يادرولىق  باعدارلاماسى تۋرالى تاريحي كەلىسىمشارت يران سانكتسيالارىنىڭ ءبىر بولىگىن الىپ تاستاۋدى قاراستىرادى. ەسكە سالايىق، 8 مامىر كۇنى اقش پرەزيدەنتى دونالد ترامپ اق ءۇيدىڭ اتالعان كەلىسىمشارتتان شىعاتىنى تۋرالى مالىمدەپ، يرانعا قارسى سانكتسيالاردى قايتا جاڭعىرتقان بولاتىن. سونىمەن قاتار، ول ەگەر وزگە ەلدەر يرانعا بولىساتىن بولسا، ولارعا دا قارسى سانكتسيا ەنگىزەتىنىن مالىمدەدى.

“The Qazaq Times”