ۇلىبريتانيا ءباسپاسوزى: سولسبەريدەگى دون ستەردجەستىڭ ولىمىنە پۋتين رەجيمى كىنالى

ۇلىبريتانيالىق اقپارات قۇرالدارى سولسبەريدەگى ۋلانۋ وقيعاسىنا رەسەيدى كىنالايدى. «Times»  باسىلىمى: «ناۋرىز ايىندا سولسبەريدەگى سەرگەي سكريپال مەن ونىڭ قىزىنىڭ جۇيكە-سال اۋرۋىن تۋدىرۋشى زاتتەكپەن ۋلانۋىنىڭ ارتىندا پۋتيندىك رەجيم تۇر. وسىدان ءتورت اي وتكەن سوڭ، شەتەلدىك اگەنتتەر تاراپىنان جاسالعان قاستاندىقتان كەيىن تاعى ەكى اعىلشىن ازاماتى ۋلانىپ، بىرەۋى قازا تاپتى. ءبىز وسى قايعىلى وقيعانىڭ كۇمانى ەڭ از نۇسقاسىن الساق تا، كرەملدىڭ بەيبىت ۋاقىتتا اعىلشىن جەرلەرىندە حيميالىق قارۋلارمەن شابۋىل جاساپ جاتقانىن انىق كورە الامىز»، - دەپ جازعان.

«سول ناۋرىز ايىنداعى حيميالىق شابۋىلدان بەيبىت تۇرعىن جاپا شەكتى. دون ستەردجەس پەن ونىڭ جولداسى چارلي روۋلي سكريپالگە قارسى قولدانىلعان ۋلى زاتتەككە تاپ بولدى» دەگەن باسىلىم، "وسى وقيعاعا قاتىستى ۇكىمەتتە بولجامدار تىم از ءارى ساناۋلى. دەمەك، سكريپال وقيعاسىنا جاۋاپ رەتىندە تەرەزا مەي جاريالاعان ەكونوميكالىق جانە ديپلوماتيالىق سانكتسيالار رەسەيدىڭ حالىقارالىق ساحناداعى اگرەسسيۆتى قادامدارىن وزگەرتپەدى", - دەپ جازادى.

الايدا، جەكسەنبى كۇنى سولسبەريدەگى وقيعا  ورنىنا كەلگەن ۇلىبريتانيا ىشكى ىستەر ءمينيسترى سادجيد دجاۆيد ۇكىمەتتىڭ انتيرەسەيلىك جاڭا سانكتسيالار ەنگىزۋ جوسپارى جوق ەكەنىن مالىمدەگەن ەدى.

ەسكە سالايىق، ۇستىمىزدەگى جىلدىڭ ناۋرىز ايىندا ۇلىبريتانيادا رەسەيدىڭ بارلاۋ قىزمەتىنىڭ قىزمەتكەرى سەرگەي سكريپال مەن ونىڭ قىزى يۋليا سكريپال ۋلى زاتتەكپەن ۋلانىپ، دارىگەرلەر ولاردىڭ ومىرلەرىن ارەڭ قۇتقارىپ قالعان ەدى. ەندى ارادان ءتورت اي وتكەننەن كەيىن، وتكەن اپتادا سكريپالدەر ۋلانعان سولسبەري قالاسىندا تاعى دا ەرلى-زايىپتى اعىلشىن ازاماتتارى ۋلانىپ، وقيعا سالدارىنان دون ستەردجەس ەسىمدى اعىلشىن ايەلى كوز جۇمدى.

 “The Qazaq Times”