روزا برۋكس پەنتاگوندى ترامپقا قارسى اسكەري توڭكەرىسكە شاقىرۋدا

«Washington Times» باسىلىمىنىڭ  2 اقپان كۇنگى سانىندا، بۇرىنعى اقش پرەزيدەنتى باراك وباما كەزىندە پەنتاگوننىڭ جوعارى ساياسي كەڭەسشىسى بولعان روزا برۋكستىڭ «اسكەري توڭكەرىس ارقىلى پرەزيدەنت ترامپتىڭ قالىپقا سيمايتىن ويلارىن وزگەرتۋگە بولادى» دەگەن پىكىرى جاريالاندى.

برۋكستىڭ «سىرتقى ساياسات» جۋرنالىنا جازعان ماقالاسىندا دا پرەزيدەنت ترامپ تۋرالى ايتقان تاعى ءبىر پىكىرى باسىلدى. ول: «امەريكا پرەزيدەنتتەرىنىڭ تاريحىندا ەڭ داۋلى پرەزيدەنت دونالد ترامپتى تاقتان تايدىرۋدىڭ ءبىر-اق جولى – اسكەري توڭكەرىس قوزعاۋ» دەدى. ول تاعى: «ترامپ تاققا وتىرعان العاشقى اپتاسىندا-اق، ءوزىنىڭ بار نيەتىن ايگىلەپ بولدى. سولاي، ول ءبارىمىزدىڭ الاڭداعانىمىزداي ناعىز ەسى اۋىسقان ادام. مەن ازىرگە دەيىن مىنانداي شەشىمگە كەلىپ بولدىم: ترامپتىڭ جاساپ جاتقان ىستەرىنە جول بەرمەس ءۇشىن امەريكا تاريحىندا بولىپ كورمەگەن اسكەري توڭكەرىس جاساۋ كەرەك».

ماقالاداعى مالىمەتتەرگە سۇيەنسەك، روزا برۋكس 2009-2011 جىلدار ارالىعىندا پەنتاگونداعى جوعارى ساياسي كەڭەسشى قىزمەتىن اتقارعان. ول اسكەري لاۋازىمدى تۇلعالاردىڭ پرەزيدەنتكە «جوق، پرەزيدەنت مىرزا، ءبىز بۇلاي جاساي المايمىز!» دەپ ايتۋىن ءوتىندى. ال، اقش سايلاۋ ۆەدومستۆوسى ءدال وسى تۇستا «مەملەكەتتىك ساياساتتى باعالاۋ» اتتى ساۋالناما جاسادى. ناتيجەسىندە، 40 پايىز قاتىسۋشى ترامپ ساياساتىن سىنعا العان. ساۋالناماعا جاۋاپ بەرگەندەردىڭ 52 پايىزى وبامانىڭ بيلىگىن قالاسا، ترامپتى قولداۋشىلار 43 پايىزدى يەلەگەن. سايلاۋ ۆەدومستۆوسىنىڭ ايتۋىنشا، ساۋالناماعا قاتىسقان امەريكالىقتاردىڭ باسىم بولىگى ترامپتىڭ ساياساتىن ايىپتاپ، ونى امەريكا تاريحىنداعى ەڭ شۋلى پرەزيدەنت دەپ ەسەپتەگەن. وعان قوسا بۇل پىكىردىڭ يەلەرى وبامانىڭ بيلىككە قايتا كەلۋىن تالاپ ەتكەن.

جوعارىدا اتالعان ماقالاسىندا برۋكس اقش اسكەري شەندىلەرىن پرەزيدەنتكە قارسى اسكەري توڭكەرىسكە اشىق ۇندەدى. ول: «اسكەريلەر انت بەرگەندە اقش-تىڭ كونستيتۋتسياسىن قورعاۋعا انت بەرگەن، پرەزيدەنتتى ەمەس»، – دەپ كورسەتتى. بۇل اقش-تا بولىپ جاتقان ساياسي داۋىلدى ەلەستەتىپ تۇر. ەندى ءبىر جاعىنان قاراعاندا، دەموكراتيانىڭ كورىنىسى دەۋگە بولادى. اقش ازاماتىنىڭ پرەزيدەنتىنە دەگەن پىكىرىن ەلدەگى بەدەلدى باسىلىمدار جاريالاپ، ترامپ بيلىگىنە قارسىلىعىن بىلدىرۋدە. بۇدان ترامپ تاققا وتىرعالى بەرى امەريكالىقتارعا وبامانىڭ ايى ءوتىپ تۇرعانى بەلگىلى بولدى.