اۋعانستان ۇكىمەتىنىڭ باسشىسى ەشرەف گاني تاليبانمەن اراداعى اتىستى توقتاتۋ ءبىتىمىنىڭ مەرزىمىن بىرجاقتى ۇزارتاتىنىن مالىمدەدى. گاني بۇل مالىمدەمەسىن اۋعانستاننىڭ تەلەارناسى ارقىلى تاراتتى. دەگەنمەن، اتىستى توقتاتۋ ءبىتىمىنىڭ مەرزىمىن ناقتى قاي ۋاقىتقا دەيىن ۇزارتاتىنى تۋرالى اشىپ ايتپادى.

گاني بۇل شەشىمنىڭ باستى ماقساتى ەلدە بەيبىتشىلىك ورناتۋ ەكەنىن، تاليبان تارابىنان وسىعان ساي جاۋاپ كۇتەتىنىن جەتكىزدى. سونىمەن بىرگە ەلدەگى ۇكىمەت جاعى وزدەرىنىڭ بەيبىت بىتىمگە دەگەن ىنتاسىن ايگىلەۋ ءۇشىن قاماۋداعى 46 تاليبان مۇشەسىن بوساتقان. ەگەر، تاليبان تارابى بىتىمگەرلىك قادامدارىن جاساساپ، ۇكىمەتتىڭ باستاماسىنا وڭ جاۋاپ قايتارسا، قاماۋداعى بارلىق تاليبان مۇشەلەرىن بوساتپاق.

تاليبان تارابى ۇكىمەت باسشىسىنىڭ مالىمدەمەسىنە جاۋاپ قايتارمادى. اۋعانستان ۇكىمەتى بىلتىر جىل سوڭىندا جانە بيىلعى جىلدىڭ باس شەنىندە تاليبانمەن بىتىمگە كەلۋ، ەلدە بەيبىتشىلىك ورناتۋ ءۇشىن كەلىسىمگە كەلۋگە شاقىرعان. ءتىپتى، تاليباندا اۋعانستانداعى رەسمي ساياسي توپ رەتىندە مويىنداۋدى دا العا قويعان. سول نەگىزدە، 20 ماۋسىمعا دەيىن تاليبانعا قارسى اتىستى توقتاتۋ شەشىمىن جاريالاعان.

الايدا، بۇعان تاليبان تارابى ۇكىمەت كۇشتەرى كۇتكەندەي جاۋاپ بەرە قويمادى. ەسەسىنە، ايت قارساڭىندا جاريالانعان بىتىمگەرلىك مالىمدەمەسىنەن كەيىن، تەررورلىق توپتار جانكەشتى جارىلىس جاسادى. تەررورلىق شابۋىلدان 20 ادام قازا بولىپ، 16 ادام جاراقات الدى. تاليباننىڭ وسىدان بۇرىنعى مالىمدەمەسىندە، ورازا ايت مەرەكەسىنە وراي ءۇش كۇن اتىستى توقتاتۋ شەشىمىن جاريالاعان.

قازىر اۋعانستان جاعدايى وتە كۇردەلى. ءسۇريا مەن يراكتا جەڭىلىس تاپقان دايش تەررورلىق ۇيىمى اۋعانستانعا جينالۋدا. ولار باستاپقىدا ەلدەگى تاليبان كۇشتەرىمەن تەرريتورياعا تالاسىپ قاقتىعىسقان. كەيىن، ەكى توپ اراسىندا جاسىرىن كەلىسىمدەر بولدى دەگەن بولجامدار بار. تاليباننىڭ دايش-پەن بىرىگىپ ۇلكەن كۇشكە اينالۋىنىڭ الدىن الۋ ءۇشىن ۇكىمەت تارابى تاليباندى كەلىسىمگە شاقىرعان بولاتىن.

“The Qazaq Times”