يتاليالىق زاڭگەر دجۋزەپپە كونتە يتاليانىڭ پرەمەر-ءمينيسترى لاۋازىمىنا كىرىسۋگە رەسمي تۇردە كەلىسىمىن بەردى. ول بۇگىن، 1 ماۋسىم كۇنى مينيسترلەرمەن بىرگە انت بەرۋگە بارادى. AFP اگەنتتىگىنىڭ حابارلاۋىنشا، يتاليا پرەزيدەنتى سەردجو ماتتارەللومەن كەزدەسۋ كەزىندە كونتە ۇكىمەتتىڭ جاڭا قۇرامىن تانىستىردى.

اسىرە وڭشىل «ليگا» پارتياسىنىڭ جەتەكشىسى ماتتەو سالۆيني ىشكى ىستەر ءمينيسترى بولىپ تاعايىندالادى، ال «بەس جۇلدىز» («Movimento 5 Stelle») پوپۋليستتىك قوزعالىسىنىڭ ليدەرى لۋيدجي دي مايو ەكونوميكالىق دامۋ مينيسترلىگىن باسقارادى. ال، وسىعان دەيىن پرەزيدەنت سەردجو ماتتارەللا تاراپىنان ۇكىمەتتىڭ قابىلدانۋىنا بىردەن-ءبىر سەبەپ بولعان 81 جاستاعى ەكونوميست پاولو ساۆونا ەۋروپالىق ىستەر جونىندەگى مينيستر بولىپ تاعايىندالماق.

ەسكە سالا كەتسەك، 27 مامىر كۇنى پرەمەر-مينيسترلىككە ۇمىتكەر دجۋزەپپە كونتە پرەزيدەنت مينيسترلەر قۇرامىن قابىلداماي قويعاندىقتان، پرەمەر-مينيسترلىك لاۋازىمىنان باس تارتقان ەدى. بۇنىڭ بارىنە ەل پرەزيدەنتى سەردجو ماتارەللانىڭ 81 جاستاعى ەكونوميست پاولو ساۆونانىڭ ەكونوميكا جانە قارجى ءمينيسترى لاۋازىمىنا كانديداتۋراسىن قابىلداۋدان باس تارتقان شەشىمى سەبەپ بولدى. ياعني، پرەزيدەنت ماتتارەلا ساۆوناعا بولا، ۇكىمەتتىڭ بارلىق قۇرامىن قابىلدامادى. وسىدان كەيىن «بەس جۇلدىز» («Movimento 5 Stelle») پوپۋليستتىك قوزعالىسى مەن انتيمميگرانتتىق «سولتۇستىك ليگا» («Lega Nord») پارتياسى تاراپىنان تاعايىندالعان جاڭا پرەمەر-مينيستر دجۋزەپپە كونتە مۇنداي جاعدايدا جۇمىس ىستەي المايتىنىن ايتىپ، ۇكىمەتتى باسقارۋدان باس تارتقان ەدى.

“The Qazaq Times”