قىتايدا قاماۋدا بولعان وتانداستارىمىز بوستاندىققا شىقتى

ەلىمىزدىڭ سىرتقى ىستەر ءمينيسترى قايرات ءابدىراحمانوۆ قىتايدا قىسىم كورىپ جاتقان 170 ەتنيكالىق قازاقتىڭ بارىن ايتتى. ۆەدومستۆو باسشىسى كورشى ەلدەگى ءاربىر قانداسىمىزدىڭ جاعدايى ءبىزدى الاڭداتىپ وتىر دەدى. بۇل تۋرالى tengrinews.kz پورتالى حابارلادى.

"بىزدە قىتايدا قىسىم كورىپ جاتقان 170 قانداسىمىز تۋرالى اقپارات بار. ولارعا قاتىستى مالىمەتتى ارعى بەتتەگى قازاقتاردىڭ تۋىستارى جانە قوعام بەلسەندىلەرى بىزگە الىپ كەلىپ بەردى. بۇل ماسەلە ءبىزدى دە الاڭداتىپ وتىر. بىلۋىمشە، ولار قازاقستاننىڭ ازاماتتىعىن الىپ ۇلگەرگەن. ەلگە قايتىپ ورالار كەزدە، قىتاي بيلىگى ولاردى شەكارادان اسىرماي، قاماپ تاستاپتى" - دەدى، قايرات ءابدىراحمانوۆ.

سونداي-اق، مينيستر قازاقستاننىڭ ازاماتتىعىن الىپ ۇلگەرمەگەن قانداستارىمىزعا كومەكتەسۋ تىم قيىن بولاتىنىن ايتتى. ويتكەنى، ۆەنا كونۆەنتسياسىنا سايكەس، باسقا مەملەكەتتەر وزگە ەلدىڭ ىشكى ساياساتىنا ارالاسا المايدى.

قازىرگى كۇنى قاماۋدا بولعان 9 وتانداسىمىز بوستاندىققا شىققان. تاعى 3 قانداسىمىزدى ەلگە قايتارىپ الۋ ماسەلەسى قارالىپ جاتىر.

“The Qazaq Times”