فوتو: inform.kz

الماتى وبلىسىنداعى شەڭگەلدى جانە قىرعاۋىلدى اۋىلدارىنىڭ  اۋماعىندا ارحەولوگيالىق قازبا جۇمىستارى جالعاسىپ جاتىر. وعان جەرگىلىكتى بيۋدجەتتەن 17 ملن تەڭگە ءبولىنىپتى. عالىمدار كونە قالالاردى قازىپ، قۇندى بۇيىمداردى ىزدەستىرۋدە. ەكسپەديتسياعا 5 مىڭنان اسا ادام جۇمىلىپتى. الايدا وبلىس اكىمدىگى تاراتقان وسى حابارلامادا مالايسارى اسۋىنداعى تاڭبالى تاستار تۋرالى بىردە-ءبىر مالىمەت جوق.  سوعان قاراعاندا ءوڭىر باسشىلىعى تالقاندالىپ جاتقان قىش تاستاردى ءالى قورعاۋعا الماعان سىندى.

مالايسارى سىلەمدەرىندەگى تاڭبالى تاستار تۋرالى اقپارات وتكەن جىلدىڭ جازىندا جازىلا باستادى. قازىر ول اۋماقتا تاس وڭدەيتىن كاسىپورىن جۇمىس ىستەيدى. سول كومپانيانىڭ قىزمەتكەرلەرى قىراتتاعى تاسقا قاشاپ سالىنعان سۋرەتتەردى ويىپ-وپىرىپ، ءالى دە اكەتىپ جاتقان كورىنەدى. اۋىل بەلسەندىلەرى بۇل جۇمىس قارقىن الار بولسا، قۇندى جادىگەرلەردەن جاقىندا ايىرىلىپ قالامىز دەپ ۇلارداي شۋلاسقان ەدى. وسىدان كەيىن، وبلىس اكىمدىگى پەتروگليفتەر سالىنعان اۋماقتى كوپ ۇزاماي قورشاۋعا الىپ، عالىمدار توبىن اتتاندىرامىز دەپ ۋادە بەرگەن. الايدا سول ۋاقىتتان بەرى ەش نارسە وزگەرمەگەن.

مالايسارى پەتروگليفتەرى. فوتو: inform.kz

 

الەكسەي مارياشەۆ، ارحەولوگ. فوتو: arheology.kz

مالايسارىدا پەتروگليفتەردىڭ بارىن العاش بولىپ ايماق جۋرناليستەرى جاريا قىلعان. كەيىن، تانىمال ارحەولوگ الەكسەي مارياشەۆ تاڭبالى تاستار تۇرعان ورىنعا بارىپ، شاعىن زەرتتەۋ جۇرگىزدى. ناتيجەسىندە، ارقارلى مەن مالايسارى سىلەمدەرىندە 20-عا جۋىق وسىنداي تاستىڭ بارىن انىقتاپ، ونداعى سۋرەتتەر قولا جانە تەمىر داۋىرلەرىندە سالىنعان دەپ بولجادى. مامان بۇل اۋماقتى ءالى دە تەرەڭىرەك زەرتتەۋ قاجەت دەپ، شاعىن ەكسپەديتسيا توبىن قۇرماق بولعان. الايدا كوپ ۇزاماي ومىردەن وزىپ كەتتى. وسىدان كەيىن، پەتروگليفتەر سالىنعان ورىنعا ەشبىر ارحەولوگ بارىپ كورمەدى.

 

 

مالايسارىداعى پەتروگليفتەرگە ەل ۇكىمەتى مويىن بۇرماسا، قۇندى جادىگەرلەر جاقىندا جويىلىپ تىنادى. بۇل - وتاندىق تاريحقا جاسالعان ۇلكەن قيانات بولار ەدى. سوندىقتان جاۋاپتى مەكەمەلەر وسى ماسەلەنى نازاردان تىس قالدىرماسا يگى ەدى...

“The Qazaq Times”