قازاق جۇرتى ناعىز «بايان سۇلۋدىڭ» بەت-بەينەسىنە تاڭداۋ جاسادى

«بايان سۇلۋ» كونديتەرلىك فابريكاسى «BAYAN SULU — 2018. حالىقتىق بەينە — حالىق تاڭداۋى» جوباسىن ۇيىمداستىرىپ، قازاقتىڭ ناعىز بايانىنىڭ قانداي بولاتىنىنا تاڭداۋ جاسادى. بۇگىن، الماتىدا وسى بايقاۋدىڭ قورىتىندىسىنا بايلانىستى ءباسپاسوز قۇرالدارىنا ارنالىپ وتكەن جيىندا، ۇيىمداستىرۋشىلار القاسى بايقاۋعا قاتىستى كوپتەگەن مالىمەتتەرىمەن ءبولىستى.

ەستەرىڭىزگە سالايىق، بايقاۋ ونلاين-داۋىس بەرۋ تۇرىندە ءوتىپ، 13 مامىر كۇنى ەڭ كوپ داۋىس جيناعان 5 قاتىسۋشىنىڭ ەسىمى انىقتالىپ، فينالدىق كەزەڭگە وتكەن بولاتىن. اقىرى، 19 مامىردا عىلىم، مادەنيەت، ديزاين، باق وكىلدەرى جانە مەديا-تۇلعالاردان قۇرالعان ادىلقازىلار القاسىنىڭ قاتىسۋىمەن ءتۇرلى كەزەڭدەردەن وتكەن قاتىسۋشىلار اراسىنان ناعىز «بايان سۇلۋعا» تاڭداۋ جاسالدى. مىڭداعان ارۋدىڭ اراسىنان 19 جاستاعى استانالىق ارۋ اديناي ريمحاش وق بويى وزىق شىققان.

«بۇل بايقاۋدى ۇيىمداستىرۋىمىزعا جىل باسىندا ەفيرگە شىققان «قوزى كورپەش — بايان سۇلۋ» سەريالى تۇرتكى بولدى. وزدەرىڭىزگە دە بەلگىلى، اتالعان سەريال حالىققا ۇسىنىلعاننان كەيىن، كوپشىلىك  تاراپىنان بايان سۇلۋدىڭ وبرازىنا قاتىستى ءتۇرلى سىندار تولاستامادى. حالىق سەريالدىڭ باس كەيىپكەرىنىڭ بويىنان قازاقتىڭ بايانىن كورە المايتىندارىن ايتىپ، نارازىلىق ءبىلدىردى. اقىرى، ءبىزدىڭ فابريكامىزدىڭ اتاۋى دا قازاقتىڭ قاستەرلى ەسىمىمەن، اڭىز تۇلعاسىمەن بايلانىستى بولعاندىقتان، قاراپ قالا المادىق. ءبىز ءوز اتىمىزعا لايىق تۇردە، بايان سۇلۋدى تانىستىرۋدى ءجون كوردىك»، - دەدى ۇيىمداستىرۋ القاسىنىڭ توراعاسى مارلەن ابۋلعازينوۆ.

ۇيىمداستىرۋشىلاردىڭ ايتۋىنشا، جەڭىمپازدى انىقتاۋ قيىنعا سوققان. سەبەبى، ۇمىتكەرلەردىڭ بارلىعى دا ءبىر-بىرىنەن وتكەن سۇلۋ ءارى قازاق قىزىنىڭ بار قاسيەتىن بويلارىنا جيناعان. «سوندىقتان، ءبىز تەك بايان سۇلۋدىڭ بەت-بەينەسىنە لايىق دەپ تانىلعان ادينايدى عانا ەمەس، فينالعا وتكەن وزگە ءتورت قاتىسۋشىمىزدى دا ءتۇرلى سىيلىقتارمەن ماراپاتتادىق»، - دەيدى ۇيىمداستىرۋشىلار. جەڭىمپاز-ارۋ سۋپەر-جۇلدە اۆتوكولىككە يە بولىپ، "بايان سۇلۋ" كونديتەرلىك فابريكاسىنىڭ بەت-بەينەسى اتاندى. ەندى،  اديناي ريمحاشتىڭ بەينەسى بىر جىل بويى فابريكانىڭ بەت-بەينەسى رەتىندە ونىڭ بارلىق ونىمدەرى مەن تانىستىرىمىندا قولدانىلماق. ايتا كەتەيىك، ۇيىمداستىرۋشىلار كوميتەتىنىڭ ايتۋىنشا، بايقاۋ ەندى جىل سايىن، ءداستۇرلى تۇردە جالعاسىن تاپپاق.

«بايقاۋعا قاتىسۋىما انام مەن قۇربىم سەبەپشى بولدى. جەڭىمپاز اتانام دەپ ويلامادىم. تەك ۇيىمداستىرۋشىلار قوڭىراۋ سوعىپ، ۇزدىك شىققانىمدى ايتقاندا، قاتتى قۋاندىم. مەن بۇعان دەيىن قانداي دا ءبىر بايقاۋعا قاتىسۋعا قىزىقپادىم. ال «بايان سۇلۋ» فابريكاسى ۇيىمداستىرعان بايقاۋ مەن ءۇشىن بارلىق جاعىنان ىڭعايلى بولدى. ماسەلەن، وزگە بايقاۋلارداعى سەكىلدى اشىق-شاشىق كيىمدەرمەن پوديۋمعا شىعۋ، جالاڭاش ءتانىڭدى كورسەتۋ سەكىلدى تالاپتار بولمادى. كەسىرىنشە، يبالىقتان اتتاماي، ءوزىڭدى ناعىز قازاقىلىق داستۇردە كورسەتۋ كەرەك ەدى. مەن ەڭ الدىمەن اتا-انامدى، اعالارىمدى ۇياتقا قالدىرماۋ جاعىن ويلادىم»، - دەيدى «BAYAN SULU — 2018. حالىقتىق بەينە — حالىق تاڭداۋى» جوباسىنىڭ جەڭىمپازى اديناي ريمحاش سايتىمىزعا بەرگەن ارنايى سۇحباتىندا.

فوتو: اديناي ريمحاش

ۇيىمداستىرۋشىلاردىڭ ايتۋىنشا، 20 اقپان كۇنى باستالىپ، 3 ايعا جالعاسقان بايقاۋعا ەلىمىزدىڭ تۇكپىر-تۇكپىرىنەن 23 000-عا جۋىق ۇمىتكەر ءوتىنىش بىلدىرگەن. سونىڭ ىشىندە ارنايى مودەراتسيادان 3000 ءوتىنىش قابىلدانعان. بايقاۋ 4 كەزەڭ بويىنشا ءوتىپ، وندا ءوزىن-ءوزى تانىستىرۋ جانە ديزاينەرلىك كيىمدە ءساندى دەفيلە، بايان سۇلۋ وبزازىن قالاي تۇسىنەتىنىن دالەلدەپ، كورسەتۋ، بي جانە ءسوز سويلەۋ، كاسىبي ءانسامبلدىڭ سۇيەمەلدەۋىمەن ءان ورىنداۋ جانە جول ءجۇرۋ ەرەجەسى تۋرالى ساۋالدارعا جاۋاپ بەرۋ سىندى تالاپتار بولعان. "قازىلار قۇرامىندا تانىمال تۇلعالار، مادەنيەت جانە ونەر مايتالماندارى مەن ديزاينەرلەر بولدى. سوندىقتان دا، ۇزدىك وبرازدى تاڭداۋ بارىسىندا ماكسيمالدى تۇردە وبەكتيۆتى بولۋدى ماقسات ەتتىك" ، - دەدى، ۇيىمداستىرۋ كوميتەتىنىڭ توراعاسى م.ابۋلعازينوۆ.

“The Qazaq Times”