اقش ەلشىلىگىنىڭ تەل-اۆيۆتەن يەرۋساليمگە كوشىرىلۋىنىڭ سالتاناتتى راسىمىنە 86 مەملەكەتتى شاقىرعان ءيزرايلدىڭ شاقىرتۋىن 54 ەل جاۋاپسىز قالدىردى. ءيزرايلدىڭ «حاارەتز» باسىلىمىنىڭ حابارلاۋىنشا، ولاردىڭ باسىم كوپشىلىگى ەۋروپا وداعىنا مۇشە ەلدەر.

سونىمەن قاتار، رەسەي، مىسىر، ءۇندىستان، جاپونيا جانە مەكسيكا ەلدەرىنىڭ دە وسى قۇتتىقتاۋ راسىمىنە قاتىسپايتىندىقتارى بەلگىلى بولدى. ەۋروپا وداعىنا مۇشە ءتورت ەل — اۆستريا، ماجارستان، رۋمىنيا جانە چەحيا رەسپۋبليكاسى عانا شاقىرتۋدى قابىل العان. ال، ەۋرووداققا مۇشە ەمەس، الايدا ەۋروپا ەلدەرى بولىپ سانالاتىن البانيا، ماكەدونيا، سەربيا، ۋكراينا جانە گرۋزيا اتالعان راسىمگە قاتىسپاق.

بۇدان بۇرىن دا سايتىمىزدا ەۋروپا وداعىنىڭ اقش ەلشىلىگىنىڭ تەل-اۆيۆتەن يەرۋساليمگە كوشىرىلۋىن قۇپتاماعانى مەن شىعىس يەرۋساليمدى وزدەرىنىڭ بولاشاق استانالارى رەتىندە سانايتىن پالەستينا حالقىنىڭ كوتەرىلىس جاساپ جاتقانى تۋرالى حابارلاعانبىز. بۇدان كەيىنگى جاعدايدىڭ قالاي بولارى بەلگىسىز. ازىرگى بەلگىلىسى، ەرتەڭ، 15 مامىر كۇنى پالەستينالىقتار وسىعان قاتىستى ءىرى مارش ۇيىمداستىرماق.

“The Qazaq Times”