ترامپتىڭ ۇلتتىق قاۋىپسىزدىك جونىندەگى كەڭەسشىسى: ماسكەۋ قيىن جاعدايدا

اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى دجون بولتون دونالد ترامپ اكىمشىلىگىنىڭ جاڭا سانكتسياسىنان كەيىن رەسەي قيىن جاعدايدا قالدى دەپ سانايدى. ترامپتىڭ رەسەيگە قاتىستى ساياساتى تۋرالى پىكىرىن بىلدىرگەن بولتون، «امەريكا داۋىسىنا» بەرگەن سۇحباتىندا وسىلاي دەگەن.

«رەسەي قيىن جاعدايدا تۇر. ترامپ رەسەيگە قاتىستى بىرقاتار قاتال سانكتسيالار سالدى... پرەزيدەنتتىڭ رەسەيگە قاتىستى قادامدارى وتە قاتال بولدى دەپ ەسەپتەيمىن. بۇل رەسەيلىكتەرگە قاتتى باتتى» ، - دەدى بولتون.

ول قازىرگى ۋاقىتتا رەسەي بيلىگىنىڭ ۋكراينادا، ورتالىق جانە شىعىس ەۋروپادا ءوز ىقپالدارىن ارتتىرۋعا تىرىساتىنىن، سوندىقتان دا رەسەيگە قاتىستى ارادا كوپتەگەن ماسەلەلەر بار ەكەنىن تىلگە تيەك ەتتى.

«ولار ءبىزدىڭ تاراپىمىزدان مۇنداي قادام كۇتپەگەن ەدى. مەنىڭشە، ترامپ ءوزىنىڭ «باراك وباما» نەمەسە ودان الدىڭعى پرەزيدەنتتەر سياقتى ەمەس ەكەنىن كورسەتتى...»، - دەد بولتون.

ەسكە سالايىق، 6 ءساۋىر كۇنى اقش رەسەيلىك جەتى وليگارحقا، 17 شەنەۋنىككە جانە رەسەيلىك 12 كومپانياعا قارسى سانكتسيا سالعان ەدى. بۇل سانكتسيالار رەسەيدىڭ نارىقتىق قورىن بۇزىپ، ءرۋبلدىڭ قۇلدىراۋىنا سەبەپ بولدى.

رەسەي پرەزيدەنتىنىڭ پرەسس-سەكرەتارى دميتري پەسكوۆ اقش باسشىسىنىڭ بۇل ارەكەتىن ناعىز سوراقىلىققا بالاپ، مالىمدەمە جاساسا، ال پرەمەر-مينيستر دميتري مەدۆەدوۆ بۇعان جاۋاپ رەتىندە قانداي دا ءبىر شارالار دايىنداۋعا تاپسىرما بەرگەن.

“The Qazaq Times”