فوتو الەۋمەتتىك جەلىدەن الىندى

ەلىمىزدەگى پوليتسەيلەر جۇرگىزۋشى كۋالىگىن سوت شەشىمىنسىز ايىرۋ قۇزىرەتىنە يە بولۋى مۇمكىن. مۇنداي وزگەرىس "اكىمشىلىك قۇقىق بۇزۋشىلىق تۋرالى" كودەكستىڭ جاڭا تۇجىرىمداماسىندا  قاراستىرىلعان. ءتيىستى زاڭ جوباسىن ىشكى ىستەر مينيسترلىگى ۇسىنىپ وتىر. ايتۋلارىنشا، اتالعان تۇزەتۋلەر سوت ورگانىن ارتىق جۇكتەمەن بوساتادى ەكەن. سونداي-اق، جۇرگىزۋشىلەرگە ۋاقىتتى ۇنەمدەۋگە كومەكتەسەدى-مىس.

ءتارتىپ ساقشىلارىنىڭ بۇل ۇسىنىسى قانشالىقتى ءتيىمدى؟ ونسىز دا جەڭ ۇشىنان جالعاسقان جەمقورلىققا شىرمالعان سالا ماماندارىنا الگىندەي قۇزىر بەرىلسە، پاراقورلىق دەندەي تۇسپەي مە؟ وسى ساۋالدارعا جاۋاپ الۋ ءۇشىن بەلگىلى زاڭگەر دۋمان بازاربەكوۆتىڭ پىكىرىن ءبىلۋدى ءجون كوردىك.

- پوليتسەيلەرگە جۇرگىزۋشىلەردى كۋالىكتەرىنەن ايىرا الاتىنداي قۇزىر بەرىلسە، سالاداعى جەمقورلىق ۇدەي تۇسپەي مە؟

- مەنىڭشە، ىشكى ىستەر مينيسترلىگىنىڭ بۇل ۇسىنىسى - تىم اسىعىس جاسالدى.  مۇنداي جاڭاشىلدىققا قوعام ءالى ۇيرەنىسە قويمادى. پوليتسەيلەرگە الگىندەي قۇزىر بەرىلسە، وندا سالا ماماندارى پاراقورلىققا ءسوزسىز ماتالادى. ءتارتىپ ساقشىلارىنىڭ قىزمەت بابىن اسىرا پايدالانىپ، جۇرگىزۋشىلەردەن اقشا سۇراۋى ۇدەي تۇسەدى. قازىردىڭ وزىندە بۇل سالادا پارا الۋ دەرەكتەرى كوبەيمەسە، كەمىگەن جوق. زاڭعا وزگەرىس ەنەر بولسا، وندا "ىزدەگەنگە سۇراعاننىڭ" كەرى كەلەيىن دەپ تۇر...

- ەلىمىزدە زاڭ بۇزعان ادامدارعا جازا تاعايىنداۋعا تەك سوتتاردىڭ عانا قۇزىرى بار. ۇكىمەت پوليتسەيلەردىڭ پارمەنىن ارتتىرسا، كونستيتۋتسياعا قارسى شىققانداي بولماي ما؟

 

فوتو: 24.kz

- كونستيتۋتسياعا قارسى شىقپايدى. بىراق، اتا زاڭدا تايعا تاڭبا باسقانداي ەتىپ كورسەتىلگەن بەلگىلى ءبىر نورمالارعا قايشى كەلەتىنى راس. ايتالىق، ءبىزدىڭ ەلدە ازاماتتاردىڭ قۇقىعىن شەكتەيتىن دۇنيەلەردى، ياعني كۋالىكتەن ايىرۋ، اكىمشىلىك قاماۋعا الۋ سىندى شەشىمدەردى تەك سوت ورگاندارى عانا قابىلدايدى. ونداي قۇزىر ەشبىر ۇيىمدا جوق. ايىپتى ادامعا تەك سوت ۇكىم كەسە الادى. ەندەشە، پوليتسەيلەرگە جۇرگىزۋشى كۋالىگىن ايىرۋ قۇزىرىن بەرۋدىڭ ءوزى - ابەستىك. قالاي بولعاندا دا، كودەكس تۇجىرىمداماسىنداعى بۇل ۇسىنىس قولداۋ تاپپايتىن شىعار. ويتكەنى، قوعام ورەتۇرەگەلۋى مۇمكىن. "الگىندەي تۇزەتۋ ەنگىزىلگەلى جاتىر!" دەگەن سىبىس شىققان كۇنى-اق، جۇرتتىڭ ۇلارداي شۋلاسىپ، الەۋمەتتىك جەلىدە نارازىلىق بىلدىرگەنىن بىلەمىز. سوندىقتان، ىشكى ىستەر مينتيسترلىگى بۇقارا پىكىرىمەن ساناسۋى ءتيىس.

- پوليتسەيلەردىڭ قۇزىرىن ارتتىرۋداعى ماقسات نە؟ سوتتاردىڭ جۇمىسىن جەڭىلدەتۋ مە؟

- ىشكى ىستەر مينيسترلىگى بۇل ۇسىنىس سوت ورگاندارىن ارتىق جۇكتەمەدەن بوساتادى دەدى. سولاي دەلىك. بىراق ادام قۇقىعىن ولاي شەكتەۋگە بولمايدى. اۋەلدە ايتقانىمداي، ايىپتى ادامدارعا تەك سوت ورگاندارى عانا ۇكىم كەسە الادى. زاڭ سالاسىندا ماماندار جەتكىلىكسىز دەسە، ولاردىڭ سانىن كوبەيتۋ كەرەك شىعار. بىراق ولاردىڭ بەلگىلى ءبىر قۇزىرىن پوليتسەيلەرگە بەرىپ، جۇمىستارىن جەڭىلدەتۋ - اقىلعا قونىمسىز. ەستۋىمشە، ىشكى ىستەر مينيسترلىگى پوليتسەيلەرگە قۇزىر بەرىلسە، كولىك جۇرگىزۋشىلەرىنە دە ءتيىمدى بولادى دەگەندى ايتقان ەكەن. ولار بەلگىلى ءبىر ىستەر بويىنشا سوتقا بارىپ، اۋرە بولمايدى. ءارى-بەرى ءجۇرىپ، سابىلمايدى دەگەندى جەلەۋ ەتكەن ەكەن. بۇل ەندى تىپتەن كۇلكىلى.

“The Qazaq Times”