![](https://qazaqtimes.com/kk/content/uploads/2018/05/9b13cd8ab2b595a955e5d2869416ebec0a5984b8-800x480.jpg?token=91fdb202601b953648212435f4e7b17d)
وڭتۇستىك كورەيا مەن سولتۇستىك كورەيا باسشىلارىنىڭ 27 ساۋىردەگى تاريحي كەزدەسۋىنەن كەيىن، بۇگىن، 2 مامىر قىتاي سىرتقى ىستەر ءمينيسترى ۋاڭ ي كحدر ورتالىق قالاسى پيوڭياڭدا (پحەنيان) ەكى كۇندىك ساپارىن باستادى. قىتاي ءسىم باسشىسىنىڭ بۇل رەسمي ساپارى قىتاي باسشىسى شي جينپيڭ (سي تسزينپين) مەن سولتۇستىك كورەيا باسشىسى كيم جوڭ ۋننىڭ (كيم چەن ىن) كەزدەسۋىنە دايىندىق ىستەرىنە باعىتتالعان. بۇل تۋرالى «شينحۋا» اقپاراتتىق سايتى حابارلادى.
دۇيسەنبى كۇنگى مالىمدەمەسىندە، قىتاي ءسىم باسشىسى ۋاڭ ي 2-3 مامىر ارالىعىندا پيوڭياڭدا رەسمي ساپاردا بولاتىنىن ايتتى. بۇل قىتاي سىرتقى ىستەر ءمينيسترىنىڭ 2007 جىلدان بەرى سولتۇستىك كورەياعا جاساعان العاشقى ساپارى.
وتكەن اپتادا الەم اقپارات كوزدەرى وڭتۇستىك جانە سولتۇستىك كورەيا باسشىلارىنىڭ كەزدەسۋىنە كوز تىككەن كەزدە، قىتاي تارابى الەم نازارىن شي جينپيڭ مەن ءۇندىستان پرەمەر-ءمينيسترى نارەندرا موديدىڭ كەزدەسۋىنە بۇرۋعا تىرىستى. بۇل كەزدەسۋ اياقتالعاننان كەيىن، قىتاي ءسىم-ءى قىسقاشا مالىمدەمە جاساپ، ەكى كورەيا اراسىنداعى كەلىسسوز ناتيجەسىن قۋاتتايتىنىن، كورەي تۇبەگىنىڭ يادرولىق قارۋسىزدانۋىن، تۇبەك ماسەلەسىن ساياسي تۇرعىدا رەتكە سالۋعا كۇش سالاتىنىن جەتكىزگەن.
ساراپشىلاردىڭ پىكىرىنە قاراعاندا، كورەي تۇبەگىندەگى جاعداي تۇبەگەيدى وزگەرىستەرگە ۇشىرادى. اسىرەسە، قۇراما شتات پەن سولتۇستىك كورەيا اراسىنداعى بايلانىستار قىزۋ دەڭگەيگە جەتتى. قىتاي سىرتقى ىستەر ءمينيسترىنىڭ بۇل ساپارى قىتاي ۇكىمەتىنىڭ كورەي تۇبەگى ماسەلەسىندە وقشاۋلانىپ قالۋدان الاڭدايتىنىن جانە ديپلوماتيالىق كۇش-جىگەرىن كورسەتكىسى كەلەتىنىن بىلدىرەدى.