بجزق: ءىرى كومپانيالار قارىزدارىن قايتارا باستادى

زەينەتاقى قورى وتكەن جىلى قۇندى قاعازدار نارىعىندا بەرەشەككە بەلشەسىنەن باتقان ءبىراز كومپانيادان قارىزدارىن وندىرە باستادى. 2014 جىلى قوردا ۇزىن-ىرعاسى 32 پروبلەمالىق ەميتەنت بولسا، قازىر ولاردىڭ 20-سى عانا قالعان. بۇل تۋرالى زەينەتاقى قورىنىڭ ءباسپاسوز قىزمەتى حابارلادى.  

زەينەتاقى اكتيۆتەرى بويىنشا قايتارىلعان قارىز كولەمى 1,25 ملرد تەڭگەگە جۋىقتايدى. قور باسشىلىعى جۇيەلى جۇمىستى بيىل دا جالعاستىرۋدى جوسپارلاپ وتىر. ولار مىندەتتەرىن ورىنداماي وتىرعان ءىرى كومپانيالاردىڭ 5 لاۋازىمدى قىزمەتكەرىن سوتقا بەرگەن ەكەن. قازىر وسى ءىس بويىنشا تەرگەۋ امالدارى ءجۇرىپ جاتىر.

شىنتۋايتىندا، پروبلەمالىق ەميتەنتتەردەن بەرەشەك ءوندىرۋ - وڭاي ەمەس. دەنى كومپانيالارىن "بانكروت" دەپ جاريالاپ، قارىزدان سىتىلىپ كەتۋدىڭ جولىن ىزدەيدى. ماسەلەن، بىلتىر زەينەتاقى قورى «قازاقستان قاعازى» كومپانيالار توبىنىڭ بۇرىنعى اكتسيونەرلەرى مەن ديرەكتورلارىنىڭ ۇستىنەن قۇزىرلى ورىندارعا شاعىمدانعان ەكەن. لوندوننىڭ جوعارعى سوتى ارىزدانۋشى تاراپتىڭ شاعىمىن قاناعاتتاندىرىپتى. الايدا كۇدىككە ىلىنگەندەر ءىرى كومپانيا بانكروتقا ۇشىرادى دەپ، جاۋاپتان جالتارىپ كەتۋى بەك مۇمكىن.

قازىر زەينەتاقى قورىنىڭ ينۆەستيتسيالىق پورتفەلىندە 20 پروبلەمالىق ەميتەنت بار. ولاردىڭ قور الدىنداعى جالپى بەرەشەك كولەمى - 41,15 ملرد تەڭگە.

“The Qazaq Times”