بريتاندىق «Sunday Times» باسىلىمىنىڭ حابارلاۋىنشا، بريتانيا ۇكىمەتى بۇرىنعى رەسەيلىك بارلاۋ اگەنتى سكريپال مەن ونىڭ قىزىنا جاڭا ازاماتتىق بەرۋدى قاراستىرىپ جاتىر. ۇلىبريتانيا ۇكىمەتى ولارعا قايتالاي قاستاندىق جاسالۋدىڭ الدىن الۋ  جانە جاڭا ءومىرىن باستاۋىنا مۇمكىندىك بەرۋ ءۇشىن سكريپال وتباسىنىڭ اقش-قا قونىس اۋدارۋىنا رۇقسات بەرمەك.  بۇل تۋرالى VOA اقپاراتتىق اگەنتتىگى حابارلادى.

«Sunday Times» باسىلىمىنىڭ حابارىندا، بريتانيانىڭ بارلاۋ اگەنتتىگى سكريپال مەن قىزىنىڭ قونىس اۋدارۋ ءىسى بويىنشا اقش ورتالىق بارلاۋ اگەنتتىگىمەن كەلىسسوزدەر جۇرگىزۋدە. حابارعا قاراعاندا، بريتانيا ۇكىمەتى بۇل ەكى ادامنىڭ قاۋىپسىزدىگى ءۇشىن «بەسكوزدى بارلاۋ اليانسىنا» مۇشە ەلدەردىڭ بىرىنە قونىس اۋدارۋىن ءۇمىت ەتەدى. اتالعان بارلاۋ وداعىنىڭ قۇرامىنا ۇلىبريتانيادان تىس، كانادا، اقش، اۋستراليا (اۆستراليا) جانە جاڭا زەلانديا كىرەدى.

ەكى ەلدىڭ بارلاۋ اگەنتتىكتەرى اراسىنداعى كەلىسسوزگە قاتىسۋشى بريتاندىق لاۋازىمدىلاردىڭ ءبىرى  «Sunday Times» باسىلىمىنا بەرگەن پىكىرىندە: «قۇراما شتات ولاردىڭ قونىستانۋى ءۇشىن ەڭ جاقسى تاڭداۋ بولار ەدى. سەبەبى، قۇراما شتاتتا ولارعا قاستىق جاساۋ مۇمكىندىگى بارىنشا تومەن. بۇعان قوسا، ولار جاڭا ازاماتتىققا يە بولعاننان كەيىن، باس اماندىعى كەپىلدەندىرىلەدى»، – دەدى.

دەگەنمەن، ۇلىبريتانيانىڭ سىرتقى ىستەر مينيسترلىگى اتالعان قونىس اۋدارۋ ءىسى تۋرالى تۇسىنىكتەمە بەرمەدى.

“The Qazaq Times”