قازاقستان مەن تاجىكستان ازاماتتاردى تىركەۋ ەرەجەسىن جەڭىلدەتتى

قازاقستان مەن تاجىكستان ەكى ەلدىڭ اۋماعىندا ازاماتتارى ءۇشىن تىركەۋ ەرەجەسىن جەڭىلدەتتى. بۇدان بىلاي ەكى ەل ازاماتتارى  اتالعان ەلدەردە 30 تاۋلىك ەمەس، 90 كۇنگە دەيىن تىركەۋسىز جۇرە الادى. تاجىكستان پرەزيدەنتى ەمومالي راحموننىڭ استاناعا ساپارى بارىسىندا ەكى ەل باسشىلارى وسىنداي شەشىمگە كەلدى.

14 ناۋرىزدا تاجىكستان پرەزيدەنتى ەمومالي راحمون جۇمىس ساپارىمەن استاناعا بارعان.

«قازاقستان تاجىكستان ءۇشىن ءىرى ەكسپورتتىق ارىپتەس. تاجىكستان ءبىزدىڭ ماڭىزدى ساۋدا ارىپتەسىمىز. بىلتىر ءوزارا ساۋدا اينالىمى 80 ملن دوللارعا جەتتى. ءبىر جىلدا 30 پايىزعا كوبەيگەن. بۇل اۋمالى-توكپەلى الەمدىك ەكونوميكادا وتە جاقسى كورسەتكىش»، - دەپ اتاپ ءوتتى قازاقستان پرەزيدەنتى نۇرسۇلتان نازارباەۆ بىرلەسكەن ءباسپاسوز ءماسليحاتى كەزىندە.

قازاقستان باسشىسى سونىمەن بىرگە استانا مەن دۋشانبە اراسىندا ۇشاتىن اۋە قاتىناسى تۋرالى دا ءسوز ەتكەندەرىن ايتتى.

كەزدەسۋ كەزىندە قازاقستان باسشىسى تاجىك ارىپتەسىن "پاراسات" وردەنىمەن ماراپاتتادى. ەكى ەل باسشىلارى بارلىعى 11 قۇجاتقا قول قويعان.

“The Qazaq Times”