ءۇندىستاننىڭ العاشقى اسكەري ۇشقىش ايەلى كىم؟

24 جاستاعى اۆاني چاتۋرۆەدي (Avani Chaturvedi) ۇندىستانداعى العاشقى ايەل اسكەري ۇشقىش اتاندى، - دەپ حابارلايدى BBC اقپارات اگەنتتىگى.

اۋە كۇشتەرى اۆاني وسى اپتادا "Mig-21 Bison" ۇشاعىن 30 مينۋت ءوزى باسقارعانىن مالىمدەدى.

اۋە كۇشتەرىنىڭ ءباسپاسوز حاتشىسى انۋپام بانەردجي (Anupam Banerjee): "بۇگىن - ەلدىڭ اۋە كۇشتەرىنىڭ تاريحىنداعى ەڭ ماڭىزدى كۇن. اۋە كۇشتەرى ايەلدەر مەن ەرلەردى ءبولىپ قاراستىرمايتىن جۇمىس ورنى بولۋعا ۇمتىلادى. ەندى وسى ماقساتىمىزعا جەتۋ جولىندا ءبىز ءبىر قادامعا جاقىنداي تۇسكەندەيمىز", - دەدى.

چاتۋرۆەدي ءۇندىستاننىڭ اۋە كۇشتەرىنىڭ قاتارىنا كىرگەن 3 ايەل اسكەري ۇشقىشتىڭ بىرەۋى. جاڭالىق 19 اقپان كۇنى بەلگىلى بولعانىمەن، بەيسەنبىگە دەيىن ەشقايدا جاريالانبادى.

چاتۋرۆەدي وقۋ ورنىن بحاۆانا كانت (Bhawana Kanth) جانە موحانا سينگحپەن (Mohana Singh) بىرگە 2016 جىلى تامامداعان. ولار دا دايىندىقتارى شەڭبەرىندە جاقىندا اسكەري ۇشاقتى باسقارادى.

2016 جىلعا دەيىن ءۇندىستاننىڭ اۋە كۇشتەرىنىڭ تەك 2,5 %-ى ايەلدەر بولاتىن. ولاردىڭ كوبىسى نەگىزىنەن تىكەلەي قاقتىعىستارعا قاتىسى جوق ايماقتاردا جۇمىس ىستەيدى.

كورشىلەس پاكىستاندا 20-عا جۋىق اسكەري ۇشقىش ايەل بار. پاكىستاننىڭ اۋە كۇشتەرى 2006 جىلدان باستاپ قاتارىنا ايەلدەردى الا باستادى.

“The Qazaq Times”