تۇركيادا ىسقىرۋ قىلمىس پا؟

2016 جىلعى كوتەرىلىستەن كەيىن تۇركيادا قوعامنىڭ ءوز ويىن ەركىن ءبىلدىرۋى بىرنەشە تەررورلىق زاڭدارمەن شەكتەلدى دەۋگە بولادى. حالىق پىكىرىن ءتۇرلى جولمەن جەتكىزۋى مۇمكىن عوي، بىراق ۇكىمەت ولاردىڭ بارلىعىن ءوز قولىنا الۋعا كىرىسكەن سياقتى، - دەپ حابارلايدى Euronews اقپارات اگەنتتىگى.

تۇركيا ۇكىمەتى قانداي ارەكەت ءۇشىن ءسىزدى اباقتىعا جابۋى مۇمكىن:

الەۋمەتتىك جەلىلەردە

سوڭعى 3 اپتادا تۇركيانىڭ سولتۇستىك سۇرياداعى اسكەري ارەكەتتەرىن تۆيتتەر جانە فەيسبۋك الەۋمەتتىك جەلىلەردە سىناعانى ءۇشىن 500-گە جۋىق ادام تۇتقىندالدى.

باق-تا

تۇركيا مەديتسينالىق اسسوتسياتسياسىنىڭ مۇشەلەرى "ادام سوعىستان بۇرىن بەيبىتشىلىككە جەتۋگە ۇمتىلۋ كەرەك" دەگەننەن سوڭ، وسى ۇيىمنىڭ 11 مۇشەسى جانە باسشىسى تۇتقىندالدى.

جەكە حاتتاردا

ستامبۋل اۆتوبۋسىندا ايەل-ساياساتكەردىڭ ۋاتساپپەن (WhatsApp) بىرەۋگە حات جازىپ جاتقانىن كورىپ قالعان جولاۋشى ونى پوليتسياعا جەتكىزىپ، ساياساتكەردى تۇرمەگە جاپقان. تاعى ءبىر دەرەك حاتيس دەنيز اكتاشتىڭ (Hatice Deniz Aktaş) تەلەفونىندا "كۇردتەر جۇمىسشىلار پارتياسىنىڭ" باسشىسى ابدۋللاح وچالاننىڭ (Abdullah Öcalan) سۋرەتى بولعان دەيدى. اتالعان كۇردتەر وداعى تۇركيا مەن ەو-دا "تەررورلىق ۇيىم" بولىپ سانالادى.

كيىمدەگى جازۋ 

وتكەن جىلعى كوتەرىلىستى ۇيىمداستىردى دەگەن ايىپپەن ۇستالعانداردىڭ بىرەۋى "قاھارمان" دەگەن جازۋى بار فۋتبولكا كيىپ كەلگەنى ءۇشىن ولاردىڭ بارلىعى سوت وتىرىسى كەزىندە قوڭىر كومبينەزون كيۋگە ءماجبۇر بولدى. كيىمگە قاتىستى زاڭ وتكەن ايدا كۇشىنە ەندى.

سۇحبات

جۋرناليست دەنيز يۋچەل (Deniz Yücel) "كۇردتەر جۇمىسشى پارتياسىنىڭ" مۇشەلەرىنەن بىرنەشە رەت تەلەفونمەن سۇحبات العانى ءۇشىن 1 جىلىن تۇرمەدە وتكىزدى. يۋچەلگە تەررورلىق ۇگىت-ناسيحات جۇرگىزدى دەگەن ايىپ تاعىلدى.

بانكتە دەپوزيت اشۋ

تۇركيانىڭ مىڭداعان ازاماتىنا ازيا بانكىنەن دەپوزيت اشقانى ءۇشىن اباقتىعا جابىلۋ قاۋپى ءتونىپ تۇر. قازىرگى پرەزيدەنت رەجەپ تايىپ ەردوعان (Recep Tayipp Erdogan) كوزىنشە 20 جىل بۇرىن اشىلعان بانكتىڭ گيۋلەن قوزعالىسىنا (Gulen movement) قاتىسى بار دەگەن كۇمان بار.

ءموبيلدى قوسىمشا جۇكتەۋ

تۇركيا ۇكىمەتى "bylock" قوسىمشاسىن مۇسىلمان كليريك فەتحۋللاح گيۋلەن (Fethullah Gulen) ەل اۋماعىنداعى بارلىق جاقتاستارىن بىرىكتىرۋ ءۇشىن ويلاپ تاپقان دەپ ويلايدى. قازىر وسى ءموبيلدى قوسىمشانى جۇكتەگەندەردى تۇتقىنداۋ كۇندەلىكتى جۇرگىزىلىپ جاتىر. جەرگىلىكتى مەكتەپتەر مەن اقش باستاماسىمەن قۇرىلعان قورلاردىڭ جاھاندىق جەلىلەرى ارقىلى ءدىني ۇيىمدى باسقاراتىن گۋلەندى ۇكىمەت وتكەن جىلعى كوتەرىلىستى ۇيىمداستىردى دەپ ايىپتاۋدا. گۋلەن بىرنەشە مارتە بۇل ايىپپەن كەلىسپەيتىنىن ايتقان. تۇركيا ونىڭ قوزعالىسىن "تەررورلىق ۇيىم" دەپ اتادى.

ماقالا جازۋ

كوپتەگەن جۋرناليستەرگە سىني كوزقاراسپەن جازىلعان ماقالالارعا بايلانىستى بىرنەشە ايىپ تاعىلدى. احمەت التان (Ahmet Altan), مەحمەت التان (Mehmet Altan), جانە نازلى يليچاك (Nazli Ilıcak) - ەلدىڭ بەلگىلى 3 ءجۋرناليسى وتكەن اپتادا ءومىر بويىنا تۇرمەگە جابىلدى. قازىر جالپى 200-300 جۋرناليست تۇرمەدە وتىر.

ىسقىرۋ

ديارباكىرداعى (Diyarbakır) ديكل ۋنيۆەرسيتەتىنىڭ (Dicle University) ءبىر توپ ستۋدەنتىنە تەرروريزمگە بايلانىستى ايىپ تاعىلىپ، 28 جىلعا تۇرمەگە جىبەرىلۋى مۇمكىن. قۇجاتتاردا سۋات مۇستافا ش (Suat Mustafa Ş) ەسىمىمەن كورسەتىلگەن ازامات كۇردتەر ولەڭىن ىسقىرىقپەن اۋەندەتكەنى ءۇشىن "تەررورلىق ۇگىت-ناسيحات" جۇرگىزدى دەپ ايىپتالۋدا.

“The Qazaq Times”