يران سوپىلارى ەرەۋىلگە شىقتى

تەھراننىڭ جەرگىلىكتى بيلىك وكىلدەرى ۇكىمەت تاراپىنان جۇرگىزىلىپ جاتقان ءدىني رەپرەسسياعا نارازىلىق بىلدىرگەن سوپىلاردى "اۆتوكولىكتەرگە شابۋىل جاساپ، يراندىق 5 ساربازدىڭ قايتىس بولۋىنا سەبەپ بولدى", دەپ ايىپتاۋدا، - دەپ حابارلايدى Al Jazeera اقپارات اگەنتتىگى. 

يراندىق " Fars" اقپارات اگەنتتىگىنىڭ مالىمدەۋىنشە، استانانىڭ پاسداران ايماعىندا «گونابادي-دەرۆيش» توبىنىڭ نارازىلىق بىلدىرۋشىلەرىن توقتاتۋعا تىرىسىپ جاتقان ساتتە پوليتسەي قىزمەتكەرلەرىن ميكرواۆتوبۋس سوعىپ، بىرنەشە ادام جارالانىپ، 3 ادام قايتىس بولدى. ميكرواۆتوبۋستى «گونابادي-دەرۆيش» توبىنىڭ مۇشەسى جۇرگىزگەن دەسەدى.

الەۋمەتتىك جەلىلەرگە تەھراننىڭ ورتالىق كوشەسىندە اق ميكرواۆتوبۋستىڭ جوعارى جىلدامدىقپەن كەلە جاتقانى جانە ونىڭ ارتىنان قۋىپ كەلە جاتقان پوليتسيا قىزمەتكەرلەرى كورسەتىلگەن ۆيدەو تاراپ كەتتى.

ال پوليتسيا قىزمەتكەرلەرى رەۆوليۋتسيالىق گۆارديا مەن اياتوللا الي حامەنەيدىڭ بۇيرىعىنا سايكەس، يران كوشەلەرىن باقىلاۋعا ءجيى شىعىپ ءجۇر.

تەلەگراممادا وسى قاقتىعىس سالدارىنان جالپى 30 ادام (اسكەري قىزمەتكەرلەر مەن ەرەۋىلشىلەر) جارالانعان دەلىنگەن.

"Tasnim" اقپارات اگەنتتىگى بولسا، 300-دەن استام ادام تۇتقىندالعانىن مالىمدەدى.

«گونابادي-دەرۆيش» ءدىني توبىنىڭ مۇشەلەرى كوشباسشىلارى "نۋر الي تاباندەح تۇرمەگە قامالۋى مۇمكىن" دەگەن حاباردان كەيىن دۇيسەنبى كۇنى ەرەۋىلگە شىقتى. تاباندەحتىڭ تۇتقىندالعانى تۋرالى اقپارات ءالى كەلىپ تۇسكەن جوق. بىراق "Majzooban " الەۋمەتتىك مەديا-اككاۋنتىنىڭ اقپاراتىنشا، ونىڭ جاقتاستارىن بيلىك وكىلدەرى قورشاپ العان.

يرانداعى ادام قۇقىقتارى جونىندەگى ورتالىق ەلدەگى سوپىلار شەيىت-يسلامنىڭ تارالۋىنا جاعداي جاسايدى دەگەن پىكىر قالىپتاسقانىن مويىندايدى.  وسى جىلدىڭ قاڭتارىندا وڭتۇستىكتەگى فارس ايماعىندا توپتىڭ كەمىندە 10 مۇشەسى تۇرمەگە قامالدى. ال باسقا بەلسەندىلەرى تەھرانداعى ەۆين تۇرمەسىندە وتىر.

ەستەرىڭىزگە سالا كەتەيىك، يرانداعى كيەلى كۋما قالاسىندا 13 اقپان كۇنى 1200-دەن استام سوپى تۇتقىندالدى. ولار تۇرعىن ۇيدە رۇقساتسىز ءدىني ورتالىق اشىپ، جەرگىلىكتى بيلىك وكىلدەرىنىڭ ونى بوساتۋعا بايلانىستى تالابىن ورىنداماعان. ونىڭ ۇستىنە ولاردا قارۋ بولعان كورىنەدى.

يران تاريحىندا بىرنەشە عاسىرلار بويى حريستيان، يۋدايزم جانە بۋدديزم سەكىلدى نەگىزگى ءدىني اعىمدارعا ەلدە بەيبىت ءومىر سۇرۋگە رۇقسات بەرىلىپ كەلدى. بىراق سۋفيزم مەن يسلامنىڭ ءداستۇرلى اعىمدارى اراسىنداعى ماسەلە يراندا قاشان دا داۋلى بولاتىن. ساراپشىلاردىڭ ويىنشا، بۇل داۋ يسلام رەسپۋبليكاسى نەگىزى قالانعان ۋاقىتتان باستاپ شيەلەنىسە ءتۇستى.

“The Qazaq Times”