فوتو: Al Jazeera

اۋعانستانعا كومەكتەسۋ بويىنشا بۇۇ ميسسياسى مەن ادام قۇقىعى جونىندەگى بۇۇ باسقارماسىنىڭ بەيسەنبى كۇنى بەرگەن ەسەبى بويىنشا، 2016 جىلى ەلدە قايتىس بولعان ادامدار سانى 3438-گە، ال جارالانعانداردىڭ سانى 7015-كە جەتكەن، - دەپ حابارلايدى Al Jazeera اقپارات اگەنتتىگى.

اۋعانستاننىڭ ارنايى وكىلى تاداميچي ياماموتو (Tadamichi Yamamoto): "بۇل ستاتيستيكالىق كورسەتكىشتەر سوعىستىڭ اسەرىن كورسەتكەنىمەن، قاراپايىم حالىققا، اسىرەسە، ايەلدەر مەن بالالارعا تۇسكەن اۋىترپالىقتى، ولاردىڭ قايعىسىن جەتكىزە المايدى", - دەدى.

2009 جىلى ەلدە بۇۇ ميسسياسى باستالعالى بەرى قاقتىعىستار مەن سۋيتسيدتەن قايتىس بولعاندار سانى 2017 جىلى 2300-گە جەتتى.

قارۋلى كۇشتەردىڭ جارىلعىش زاتتاردى پايدالانۋى وتكەن جىلى جۇزدەگەن ادامنىڭ ولىمىنە الىپ كەلدى. "وسىنداي جارىلعىش زاتتاردىڭ زاڭسىز، ءارى بەي-بەرەكەت ءتۇرلى ايماقتاردا قولدانىلاتىنى ادامدى قورقىتادى"- دەيدى ياماموتو.

ەسەپتە جالپى قۇربانداردىڭ 42%-نا اۋعان تاليباندارى، 10%-نا "يسلام مەملەكەتى" جاۋاپتى دەپ كورسەتىلگەن. 20%-عا جۋىعىنىڭ ولىمىنە اۋعان ۇلتتىق قاۋىپسىزدىك اسكەرى مەن حالىقارالىق قارۋلى كۇشتەر كىنالى كورىنەدى.

بۇۇ-نىڭ ادام قۇقىعى جونىندەگى جوعارعى كوميسسارى زەيد رااد ال-حۋسەين (Zeid Ra'ad Al Hussein) "كىنالىلەردى جاۋاپقا تارتۋعا" شاقىردى. سونىمەن قاتار "قانشاما ادامنىڭ ولىمىنە جاۋاپتى ادامدار جازاسىنان قاشىپ جۇرگەندە اۋعانستان حالقى وسىمەن نەشە جىل ۇرەيلەنىپ، سوعىستان كوز اشپاي ءومىر ءسۇرىپ كەلەدى. مۇنداي شابۋىلدار حالىقارالىق گۋمانيتارلىق قۇقىق تاراپىنان تىيىم سالىنعان، كوپ جاعدايدا ولار قاراپايىم شابۋىل ەمەس، اسكەري قىلمىس بولىپ كەلەدى",- دەدى.

بۇۇ اقپاراتىنا سايكەس، ايەلدەر ءولىمى 5%-عا وسكەن: 359-ى مەرت بولىپ، 865-ءى جاراقات العان.

2016 جىلمەن سالىستىرعاندا بالا-قۇرباندار سانى 10%-عا ءوسىپ، جالپى 3179 ادامدى قۇراعان (861-ءى قايتىس بولعان، 2318-ءى جارالانعان).

“The Qazaq Times”