فوتو: ريا نوۆوستي

تۇركيانىڭ پرەمەر-ءمينيسترى بينالي يىلدىرىم جەكسەنبى كۇنى ستامبۋلدا وتكەن ءباسپاسوز كونفەرەنتسياسى بارىسىندا تۇرىك اسكەرىنىڭ سۇرياداعى  YPG (كۇرد دەموكراتيالىق وداعى پارتياسىنىڭ قارۋلانعان اسكەرى) ۇيىمىنىڭ قول استىنداعى اۋدانعا گۇلبابا اۋىلىنان اتتانعانىن حابارلادى. تۇركيا پرەزيدەنتى رەدجەپ تايپ ەردوعان اسكەري وپەراتسيانىڭ از ۋاقىتتا اياقتالارىنا سەنىم ءبىلدىردى. انادولى اقپاراتتىق اگەنتتىگى تۇرىك اسكەرىنىڭ افرين ايماعىنا كىرگەنىن جانە كۇرد جاساقتارىنان قۇرالعان تاۋەلسىز ءسۇريا اسكەرىنىڭ (Free Syrian Army - FSA) قارسى باعىتتا قوزعالا باستاعانىن جازدى. 

FSA مالىمەتىنشە، تۇركيا مەن ءسۇريا شەكاراسىنداعى ەكى اۋىل شابۋىلعا ۇشىراعان. اسكەري وپەراتسياعا تۇركيانىڭ 72 اۋە بومبىلاۋشى ۇشاعى قاتىسقان. ولار كۇرد اسكەرى جانە "يسلام مەملەكەتى" لاڭكەستىك ۇيىمىنىڭ سودىرلارى جاسىرىنعان ورىن دەپ بولجانعان 153 نىساندى بومبىلاعان. كۇرد اسكەرى تاراپىنان تۇسكەن مالىمەت بويىنشا، تۇركيانىڭ وق جاۋدىرۋ وپەراتسياسىنان كەمىندە 6 بەيبىت تۇرعىن قازا تاۋىپ، 13-ءى جارالانعان.

تۇركيا پرەزيدەنتى رەدجەپ تايىپ ەردوعان مەملەكەت ىشىندەگى كۇردتەردىڭ وپپوزيتسيالىق توپتارىنا اسكەري وپەراتسياعا قارسى نارازىلىق شەرۋىنە شىقپاۋ تۋرالى ەسكەرتۋ جاسادى. ول: "كوشەگە شىقساڭدار، بيلىك ءبارىن ءجىتى نازاردا ۇستاپ وتىرعانىن ءبىلىپ جۇرىڭدەر", - دەدى.

فوتو: al-jazeera.com

تۇركيا سۇرياداعى كۇردتەردىڭ دەموكراتيالىق وداعى پارتياسى مەن ونىڭ YPG  دەپ اتالاتىن قارۋلانعان اسكەرىن "تەرروريستىك ۇيىمدار" تىزىمىنە قوسقان. افرين ايماعىنداعى كۇرد اسكەرلەرىنىڭ سانى 8-10 مىڭ ارالىعىندا دەپ ەسەپتەلەدى. اقش وسىدان بۇرىن كۇرد جاساقتارىن "يسلام مەملەكەتى" لاڭكەستىك ۇيىمىنا قارسى كۇرەستەگى ۇتىمدى قۇرلىق اسكەرى دەپ باعالاپ، قارۋ-جاراقپەن قامتاماسىز ەتكەن بولاتىن. رەدجەپ تايىپ ەردوعان: "كۇرد توپتارىنىڭ اتى وزگەرگەنىمەن، ولاردىڭ بارلىعى بىردەي - تەررورشىلار" دەگەن پىكىر ءبىلدىردى.

اسكەري وپەراتسيا ءجۇرىپ جاتقان وڭىردەن حابار تاراتقان AFP ءتىلشىسى جەرگىلىكتى مەكتەپتەردىڭ جابىلعانىن، تۇرعىندارعا ءبىر ورىنعا شوعىرلانۋعا تىيىم سالىنعانىن، وق داۋىستارى ءجيى ەستىلىپ، حالىق ۇرەي ۇستىندە ەكەنىن ايتادى.

“The Qazaq Times”