تۇركيا وندىرەتىن الىس ارالىققا اتىلاتىن زىمىران جوباسى. فوتو: انادولى.

تۇركيانىڭ قورعانىس مينيسترلىگىمەن سول ەلدىڭ قورعانىس ونەركاسىبىنىڭ الىپتارى كەلىسىمگە قول قويىپ، تۇركيانىڭ وتاندىق الىس ارالىقتى زىمىراندارىن ءوندىرۋدى قولعا الدى. بۇل تۋرالى «انادولى» اقپاراتتىق اگەنتتىگى حابارلادى.

اتالعان كەلىسىمگە تۇركيانىڭ اسكەري ەلەكترونيكا ءوندىرۋشى «اسەلسان» جانە زىمىران ءوندىرۋشى «روكەتسان» قاتارلى ءىرى ونەركاسىپ ورىندارى مەن تۇركيا عىلىم-تەحنولوگيا زەرتتەۋ ورتالىعى جانە تۇركيا قورعانىس مينيسترلىگىنە قاراستى قورعانىس ونەركاسىپ كەڭەسشىلەرى قول قويعان.

كەلىسىمگە ساي، اتالعان تاراپتار بىرلەسە وتىرىپ، تۇركيانىڭ الىس ارالىققا اتىلاتىن زىمىراندارىن دايىندايدى. «اسەلسان» كومپانياسىنىڭ مالىمدەۋىنشە، كومپانياعا بەرىلگەن تاپسىرىستار 2021 جىلعا دەيىن دايىن بولادى. ونىڭ قۇنى شامامەن 279 ملن 258 مىڭ ەۋرو ەكەنى ايتىلعان.

“The Qazaq Times”