يران بۇرىنعى مينيسترلەردى داعدارىستى شەشۋدىڭ جولىن قاراستىرۋعا شاقىردى

يراننىڭ بۇرىنعى ساياساتكەرلەرى جانە ەكونوميكا ماماندارى ەلدەگى داعدارىستى وڭاۋدىڭ جولدارىن قاراستىرۋدا. ولار داعدارىس استارىنداعى ەكونوميكالىق ماسەلەلەردى تالقىلاپ، شەشۋدىڭ امالىن قاراستىرۋدا. بۇعان ەلدەگى بىرقاتار ەكونوميكا ماماندارىمەن قاتار ەلدىڭ بۇرىنعى مينيسترلەرى دە قاتىستى. بۇل تۋرالى «People» باسىلىمىنىڭ رەسمي سايتى جازدى.

كەڭەسكە قاتىسقان بۇرىنعى مينيسترلەر اراسىندا يران يسلام ەڭبەك پارتياسىنىڭ توراعاسى، بۇرىنعى ەڭبەك جانە حالىقتى الەۋمەتتىك قورعاۋ ءمينيسترى حۇسەين كەمالي داعدارىستىڭ ناقتى سەبەپتەرىنە توقتالدى. ول سوزىندە: «بۇل رەتكى مەشحەد قالاسىندا باستالعان حالىقتىق ەرەۋىلدەردىڭ استارىندا ءتۇرلى سەبەپتەر بار. ايتالىق، ينفلياتسيا، ۆاليۋتا باعامىنىڭ تۇراقسىزدىعى، جۇمىسسىزدىق، جەمقورلىق، ينفراقۇرىلىمداعى ولقىلىقتار، اۋا لاستانۋ جانە اۋىل شارۋاشىلىق سالاسىنداعى قيىندىقتار قاتارلىلار بار. قازىرگى جانە بۇرىنعى مينيسترلەر بۇل سالالارداعى كەمشىلىكتەردى تەز ارادا تۇزەتۋگە تۋرا كەلەدى»، – دەدى.

بۇدان سىرت ەكونوميكا ماماندارى قازىرگى كەزدەگى يران ەكونوميكاسى تاپ بولىپ وتىرعان ەڭ كۇردەلى دەگەن 5 ماسەلەنى اتاي وتىرىپ، ۇكىمەتكە شەشۋ جولدارىن كورسەتتى. ەكونوميستەردىڭ ءبىر بولىگى ورتالىق ازيا، تاياۋ-شىعىس جانە ەۋروپا مەن قىتايعا باعىتتالعان جاڭا ەكونوميكالىق باعدارلامالاردى ءتۇزىپ شىعۋدى ايتسا، تاعى بىرەۋلەرى ىشكى ءوندىرىستى دامىتۋ ءۇشىن بيۋدجەتتىڭ شەتكە اعىلۋىن قىسقارتۋدى ورتاعا سالدى.

شەتەل ساراپشىلارىنىڭ پىكىرىنشە، يراننىڭ قازىرگى ۇكىمەتى ەلدىڭ ەكونوميكاسى مەن الەۋمەتتىك جاعدايىن باقىلاۋدان شىعارىپ قويعان. بۇل ءۇشىن يران ىشكى جانە سىرتقى ساياساتتا رەفورما جاساۋى ءتيىس دەپ قارايدى.

“The Qazaq Times”