فوتو اقش-تىڭ جەر سەرىگىنەن تۇسىرىلگەن.

وڭتۇستىك كورەيا وتكەن ايدا سولتۇستىك كورەياعا بۇۇ-نىڭ سانكتسيالارىنا قاراماستان، جاسىرىن تۇردە مۇناي تاسىمالداعان كەمەنىڭ قولعا تۇسكەنى تۋرالى حابارلادى. رەسمي مالىمدەمەگە سايكەس، Lighthouse Winmore كەمەسى سولتۇستىك كورەياعا تيەسىلى كەمەگە 600 توننا مۇنايدى تيەگەنى انىقتالعان. اقش پرەزيدەنتى دونالد ترامپ وسىعان دەيىن قىتايدىڭ پحەنيانعا تاۋار تاسىمالىن توقتاتپاعانى تۋرالى كۇدىگىمەن بىرنەشە رەت بولىسكەن ەدى. قىتاي ءوزىنىڭ بۇل وقيعاعا قاتىسى بارىن تولىقتاي جوققا شىعارىپ وتىر. گون-كونگتا تىركەلگەن كەمەنى تايۆاننىڭ Billions Bunker Group Corp كومپانياسى جالعا العاندىقتان، پەكيننىڭ كىناسىن دالەلدەۋ ازىرگە مۇمكىن بولماي وتىر. 

Yonhap اقپاراتتىق اگەنتتىگىنىڭ مالىمەتىنشە، كەمە يوسۋ (وڭتۇستىك كورەيا) پورتىنا 11 قاراشادا توقتاپ، وسى جەردەن تازارتىلعان ماي تيەگەن سوڭ، 4 كۇننەن كەيىن تايۆان باعىتىنا بەت العان. دەگەنمەن كەمە حالىقارالىق سۋلاردا 19 قاراشا كۇنى سولتۇستىك كورەيا كەمەسىمەن كەزدەسىپ، جۇكتى تاپسىرعان. The New York Times باسىلىمى اقش-تىڭ عارىشتاعى جەر سەرىگىنەن الىنعان سۋرەتتەردە قوس كەمەنىڭ كەزدەسكەن تۇسى بەينەلەنگەنىن جازدى.

قىتاي ۇكىمەتى مەملەكەتتەگى فيزيكالىق نە زاڭدى تۇلعالاردىڭ ەشبىرىنە بۇۇ ەنگىزگەن سانكتسيالاردى بۇزۋعا ەشقاشان جول بەرمەيتىنىن حابارلادى. اقش پرەزيدەنتى دونالد ترامپ ءوزىنىڭ تۆيتتەر پاراقشاسىنا: "قىتاي ىستىق قولدارىمەن ۇستالدى. قىتايدىڭ سولتۇستىك كورەياعا مۇناي تاسىمالداعانىنا وتە نارازىمىن. ەگەر بۇلاي جالعاسا بەرسە، ءبىز سولتۇستىك كورەيا ماسەلەسىنىڭ بەيبىت شەشىمىنە قول جەتكىزە المايمىز", - دەپ جازدى. ول The New York Times باسىلىمىنا بەرگەن سۇحباتىندا امەريكا قىتايدىڭ پحەنياننىڭ يادرولىق قارۋ باعدارلاماسىن توقتاتۋعا بايلانىستى كومەگىنە ءۇمىت ارتىپ، اراداعى ساۋدا كەلىسىمدەرىمدەرىنە بارىنشا جۇمساق قاراپ كەلگەنىن، سوڭعى وقيعا اقش پەن قىتايدىڭ ارىپتەستىك بايلانىستارىنا زاردابىن تيگىزەتىنىن ايتتى.

“The Qazaq Times”