جاپونيا سولتۇستىك كورەياعا قارسى اۋە كۇشتەرىنىڭ قۋاتىن ارتتىرماق

جاپونيا ۇكىمەتى العاش رەت زىمىران تەحنيكالاردى ساتىپ الۋدى جوسپارلاپ وتىرعانىن ءبىلدىردى. بۇل زىمىراندار سولتۇستىك كورەيانىڭ ماڭىزدى اسكەري بازالارىنا الىستان شابۋىل جاساۋ مۇمكىندىگى بار. سونىمەن بىرگە، جاپونيا ۇكىمەتى بۇل قادامدى سولتۇستىك كورەيادان كەلەتىن يادرولىق قاۋىپتەن قورعانۋ ءۇشىن جاساعالى وتىرعانىن العا تارتتى. بۇل تۋرالى «WSJ» باسىلىمى حابارلادى.

جاپونيا ۇكىمەتىنىڭ وتكەن اپتانىڭ سوڭىندا جاريالاعان مالىمەتىندە، Lockheed Martin Co. (LMT) كومپانياسىنىڭ زىمىراندارىن قامتىعان بۇل  ساتىپ الۋ ىسىنە اقش پرەزيدەنتى دونالد ترامپ تا كەلىسىم بەرگەنى تۋرالى ايتىلعان. ترامپ قاراشا ايىندا توكيو ساپارى كەزىندە جاپونيا ۇكىمەتىن اقش-تان قارۋ-جاراق ساتىپ الۋعا شاقىرعان.

جاپونيا ۇكىمەتى تاراتقان مالىمەتتە، الداعى جىلدىڭ بيۋدجەت جوسپارىندا 19 ملن اقش دوللارىن، جاپوندىق F-35 ۇشاقتارىنا نورۆەگيادا جاسالعان Joint Strike Missile (JSM) زىمىرانىن ساتىپ الۋعا جۇمسالاتىنى ايتىلعان.  بۇل زىمىرانداردىڭ ۇشۋ ارالىعى 300 ميلگە دەيىن جەتەدى. ەلدىڭ قورعانىس مينيسترلىگى سونداي-اق، F-15 سوعىس ۇشاقتارىن جوندەۋ، قالپىنا كەلتىرۋ جۇمىستارىنا دا قارجى ءبولىپ، ولاردى «Lockheed Martin» ازىرلەگەن كرۋيزدىك زىمىراندارمەن جابدىقتاماق. بۇل تۇردەگى زىمىرانداردىڭ ۇشۋ ارالىعى 620 ميلگە دەيىن جەتەدى. ياعني، جاپونيا تارابى سوعىس ۇشاقتارى ارقىلى سولتۇستىك كورەيانىڭ زىمىران قاۋىپتەرىنە قارسى تۇرا الادى، ءارى اسكەري بازالارىنا الىستان شابۋىل جاساي الادى.

ءباسپاسوز ءماجىلىسى كەزىندە جۋرناليستەر قورعانىس مينيسترلىگىنىڭ وكىلىنەن بۇل زىمىرانداردىڭ سولتۇستىك كورەياعا قاراتىلا قولدانىلۋى مۇمكىن بە دەگەن سۇراقتار قويعان. جاپونيا قورعانىس وكىلدەرى بۇعان: «تىكەلەي ۇلتتىق قاۋىپسىزدىككە قاتەر تونگەن جاعدايدا نەمەسە ديپلوماتيالىق جولدار جابىلىپ، قارۋلى كۇش قولدانۋ شەشىمى ءبىراۋىزدان قۇپتالعان جاعدايدا قولدانىلۋى مۇمكىن. ال، قازىر بۇل ءبىزدىڭ قاۋىپسىزدىكتى قامتاماسىز ەتۋ ءۇشىن جاسالعان شارالار»، – دەگەن جاۋابىن بەرگەن.

“The Qazaq Times”