فوتو: azattyq.org

اقش پرەزيدەنتى دونالد ترامپ يەرۋساليمدى ءيزرايلدىڭ استاناسى دەپ مويىنداۋ تۋرالى شەشىمىن كەيىنگە قالدىراتىن بولدى. بۇل اقش وداقتاستارى مەن وزگە مەملەكەتتەر تاراپىنان تۋىنداعان نارازىلىقتار مەن تۇسىنىسپەۋشىلىكتەرگە بايلانىستى. اق ءۇي پرەزيدەنتتىڭ  اقش-تىڭ تەل-اۆيۆتەگى ەلشىلىگىن يەرۋساليمگە كوشىرۋ تۋرالى سوڭعى  شەشىمى جاقىن كۇندەرى جاريالاناتىنىن حابارلادى. 

دونالد ترامپتىڭ اقش ەلشىلىگىن يەرۋساليمگە كوشىرۋ تۋرالى باستاماسىنان كەيىن امەريكا باسشىسىنا الەم ساياساتكەرلەرى تاراپىنان وتە كوپ قوڭىراۋ تۇسكەن. يزرايل مەن پالەستينا اراسىنداعى ءار تاراپ يەرۋساليمدى  ءوز استاناسى كورەتىن داۋدىڭ سوڭعى نۇكتەسى قويىلماعانىنا قاراماستان، اقش-تىڭ ونى ءيزرايلدىڭ مەنشىگى دەپ مويىنداۋى كوپ مەملەكەتتىڭ نارازىلىعىن تۋدىردى.

فرانتسيا پرەزيدەنتى ەممانۋەل ماكرون: "بۇل ماسەلە يزرايل مەن پالەستينا اراسىندا شەشىلەتىن تاقىرىپ", - دەپ، اقش-تى سىرتقى ساياساتىنا ۇلكەن وزگەرىستەر اكەلەتىن قادامعا بارماۋدى ەسكەرتتى. تۇركيا: "اقش-تىڭ ءبىر تاراپتى قولداۋىن بۇلاي اشىق ءبىلدىرۋى وڭىردە جاڭا قاقتىعىستار مەن تارتىستاردىڭ تۋىنداۋىنا الىپ كەلەدى", - دەپ قاۋىپتەنسە، اراب مەملەكەتتەرىنىڭ وداعى تاياۋ شىعىستىڭ تۇراقتىلىعىنا الاڭدايتىنىن ءبىلدىردى.

بارلىق مەملەكەتتەردىڭ باس ەلشىلىگى تەل-اۆيۆتە ورنالاسىپ، يەرۋساليمدە كونسۋلدىقتار جۇمىس ىستەيدى. 1995 جىلى اقش كونگرەسى ءوز ەلشىلىگىن يەرۋساليمگە اۋىستىرۋ تۋرالى ارنايى اكت قابىلداعانىمەن،  بيلل كلينتوننان باستاپ، باراك وباماعا دەيىنگى پرەزيدەنتتەر ۇلتتىق قاۋىپسىزدىكتى ساقتاۋ ماقساتىندا بۇل شەشىمدى زاڭدى كۇشىنە ەنگىزۋدى كەيىنگە قالدىرىپ كەلدى. ەندى  وزىنە دەيىنگى باسشىلار بارا الماعان باتىلدىققا دونالد ترامپتىڭ قايراتى جەتەر-جەتپەسى جاقىن كۇندەرى بەلگىلى بولادى.

“The Qazaq Times”