فوتو: Reuters

رەسەيدىڭ سىرتقى ىستەر ءمينيسترى سەرگەي لاۆروۆ اقش-تىڭ بارلىق مەملەكەتتەردىڭ سولتۇستىك كورەيامەن بايلانىسىن ءۇزۋ تۋرالى تالابىن قابىلدامادى. رەسەيدىڭ وكىلى پيوڭياڭنىڭ سوڭعى وتكىزگەن بالليستيكالىق زىمىران سىناعىنان كەيىن امەريكانىڭ بۇۇ-داعى ەلشىسى نيككي حەيليدىڭ سولتۇستىك كورەياعا قىسىمدى كۇشەيتۋ تۋرالى ەسكەرتۋىنە جاۋاپ بەردى. بۇل تۋرالى ءال-جازيرا اقپاراتتىق اگەنتتىگى جازدى. 

مينسكىدە جۋرناليستەرگە بەرگەن سۇحباتى كەزىندە سەرگەي لاۆروۆ: ء"بىز بۇل ۇسىنىستى نەگاتيۆتى قابىلدادىق" دەپ جاۋاپ بەردى. وسىعان دەيىن رەسەيلىك باس ديپلومات دونالد ترامپ پەن سولتۇستىك كورەيا باسشىسى اراسىنداعى ءسوز سوعىسىن "كىشكەنتاي بالالاردىڭ ويىنىنا" بالاعان بولاتىن.

سولتۇستىك كورەيا ءوزىنىڭ ەڭ ءىرى بالليستيكالىق زىمىران سىناعىن وتكىزگەننەن كەيىن، اقش پيوڭياڭعا قارسى جاڭا سانكتسيالار ەنگىزدى. دونالد ترامپ سولتۇستىك كورەياعا قارسى قىتايدىڭ ارىپتەستىگىنە ارقا سۇيەيتىنىن حابارلادى.

“The Qazaq Times”