«ۇشتىك سامميتتە» نە شەشىلدى؟

رەسەي پرەزيدەنتى ۆلاديمير پۋتين تۇركيا باسشىسى رەدجەپ تايىپ ەردوعان جانە يراننىڭ كوشباسشىسى حاسان روۋحانيمەن كەزدەسىپ، ءسۇريا ماسەلەسىن تالقىلادى. التى جالعا سوزىلعان سوعىستى توقتاتۋ ماقساتىندا وسى تاقىرىپتا كونگرەسس وتەدى دەپ كەلىسىلدى. كەزدەسۋگە قاتىسقان مەملەكەتتەر ءسۇريا ۇكىمەتى مەن وپپوزيتسياسىن كونسترۋكتيۆتى ديالوگقا كەلۋگە شاقىردى. سوچي قالاسىندا وتەدى دەپ كۇتىلىپ وتىرعان كونگرەسستىڭ ناقتى ۋاقىتى جاريالانعان جوق. 

ءدال وسى ۋاقىتتا ساۋد ارابياسىندا سۇرياداعى وپپوزيتسيا باسشىلارىنىڭ كەزدەسۋى ءوتتى. جەنەۆا كەلىسسوزدەرىنىڭ الدىندا ءبىر مامىلەگە كەلىپ الۋ ماقساتىندا ۇيىمداستىرىلعان باس قوسۋعا سۇرياداعى بىرقاتار بەلگىلى توپتاردىڭ باسشىلارى قاتىستى.

رەسەي پرەزيدەنتى جۋرناليستەرگە بەرگەن سۇحباتى بارىسىندا، سۇرياداعى "يسلام مەملەكەتى" لاڭكەستىك ۇيىمىنا قارسى سوعىستىڭ ناتيجەلى اياقتالىپ كەلە جاتقانىن ايتتى. ول ەندى تەررورشىلاردىڭ قولىنان جاقىن ۋاقىتتا تولىقتاي ازات بولاتىن سۇرياعا جاڭا كونستيتۋتسيا قابىلداپ، بۇۇ-نىڭ باقىلاۋىمەن دەموكراتيالىق قۇندىلىقتار تولىق ساقتالاتىن ءادىل سايلاۋ وتكىزۋ كەرەكتىگىن جەتكىزدى. بۇل ءۇشىن بيلىككە تالاسىپ وتىرعان بارلىق تاراپتار بەيبىت كەلىسسوزدەرگە كەلىپ، سايلاۋدىڭ وتۋىنە مۇددەلى بولۋى كەرەك.

“The Qazaq Times”