فوتو: Getty Images

Brexit جوباسى اياقتالعاننان كەيىن ەۋرووداقتان شىعاتىن لوندونداعى بىرقاتار ماڭىزدى كەڭسەلەر پاريج بەن امستەردامعا كوشىرىلەدى. اتاپ ايتساق، ەۋروپالىق بانك باسقارماسى پاريجگە، ال ءدارى-دارمەك بويىنشا ەۋروپالىق اگەنتتىك امستەردامعا قونىس اۋدارادى. بۇل تۋرالى ۆۆس اقپاراتتىق اگەنتتىگى جازدى. 

قوس مەكەمە لوندوندا مىڭعا جۋىق ازاماتتى جۇمىسپەن قامتاماسىز ەتىپ وتىرعان بولاتىن. ەۋروپالىق بانك باسقارماسىنىڭ ءوز ەلىندە بولۋى ءۇشىن باسەكەگە 8 ەل قاتىسسا، ءدارى-دارمەك بويىنشا ەۋروپالىق اگەنتتىكتىڭ جاڭا ورنى بولۋعا ءوز قالاسىن ۇمىتكەر ەتىپ 16 مەملەكەت قوسقان.

فرانتسيانىڭ پرەزيدەنتى ەممانۋەل ماكرون ءپاريجدىڭ جەڭىسىن ونىڭ بۇكىل الەمنىڭ نازارىنداعى قالا بولۋىمەن بايلانىستىردى. ەۋروپالىق بانك باسقارماسىنىڭ قىزمەتكەرلەرى وتكەن جىلى وداققا مۇشە ەلدەرگە 700 رەت ءارتۇرلى ميسسيالارمەن ساپارلاعان. وسىعان وراي باسقارما ورنالاساتىن قالانىڭ اۋە جولدارىنىڭ ينفراقۇرىلىمى دا داۋىس بەرۋ كەزىندە ەسكەرىلدى.

“The Qazaq Times”