فوتو: dw.com

ەۋروپا وداعى ەلدەرى افريكا مەن ورتا شىعىستان كەلگەن 34 مىڭ بوسقىندى قابىلداۋعا كەلىسىم بەردى. بۇل شەشىم ءبىر كۇن بۇرىن بۇۇ-نىڭ ەۋروپا ەلدەرىنىڭ ليۆيادان كەلگەن قايىقتاردى شەكارادان وتكىزبەگەن، ادامگەرشىلىك تۇرعىسىنان اقتالمايتىن ارەكەتتەرى ءۇشىن  سىنعا ۇشىراعاننان كەيىن قابىلدانىپ وتىر. وداققا مۇشە 16 مەملەكەت ەۋروپا كوميسسياسىنىڭ الداعى ەكى جىل ىشىندە 50 مىڭعا جۋىق بوسقىندى قابىلداۋ  تۋرالى باعدارلاماسىنا سايكەس،  34 مىڭ بوسقىندى ءبولىپ  الىپ، وز ەلدەرىنەن باسپانا تاۋىپ بەرۋگە كەلىسىم بەردى. 

ەۋرووداقتىڭ بوسقىندار بويىنشا كوميسسارى دميتريس اۆراموپولۋس قابىلدانعان شەشىم شەكارانى زاڭسىز اساتىن ميگرانتتاردىڭ قاۋىپتى جولداردى تاڭداپ، تەڭىزدە ءولۋ قاۋپىن ازايتارىنا سەنەدى. 2015 جىلى ەڭ العاش بوسقىندار داعدارىسى باستالعان ۋاقىتتان بەرى ارادا ەكى جىل ۋاقىت وتسە دە، جەرورتا تەڭىزى تۇبىنە باتىپ كەتەتىن قايىقتاردىڭ قايعىلى وقيعاسى ءالى دە ءجيى كەزدەسەدى. ەۋروپا كوميسسارى وداققا مۇشە مەملەكەتتەردىڭ بۇل ماسەلەنى بىرىگىپ شەشۋ تۋرالى ورتاق كەلىسىمگە كەلگەنى جاعدايدىڭ تۇراقتالعانىن كورسەتەتىنىن جەتكىزدى.

سونداي-اق ول، پولشا، چەحيا جانە ۆەنگريانى بوسقىنداردى قابىلداۋدان تۇبەگەيلى باس تارتۋ ساياساتىن قايتا قاراۋعا شاقىردى. ولاي بولماعان جاعدايدا ەۋروپا كوميسسياسى ءتيىستى شارالار قابىلداۋعا ءماجبۇر بولاتىنىن جەتكىزگەن وكىل يتاليا مەن گرەتسياداعى بوسقىنداردىڭ ءبىر بولىگىن باسقا ورىنعا قونىستاندىرۋ قاجەتتىلىگىن حابارلادى. ەكىنشى دۇنيەجۇزىلىك سوعىستان بەرى العاش رەت ەڭ ۇلكەن بوسقىندار اعىنىن ۇشىراتىپ وتىرعان ەۋروپا ەلدەرى ماسەلەنى شەشۋ ءۇشىن ليۆيانىڭ شەكارا قىزمەتىمەن جەرورتا تەڭىزى ارقىلى ەۋروپاعا وتۋگە ىنتالى ميگرانتتاردى قولعا ءتۇسىرۋ تۋرالى كەلىسىمگە كەلگەن بولاتىن. بۇۇ ەۋرووداقتىڭ بۇل ارەكەتىن قاتاڭ سىنعا الىپ، "ليۆيادا قولعا تۇسكەن ميگرانتتاردىڭ قايعىسى - ادامزات بالاسىنىڭ ارىنا جۇك" دەپ اتادى.

“The Qazaq Times” |