اقش كورەي تۇبەگىنە جاقىن ماڭدا ون جىلدان بەرگى ەڭ سالماقتى اسكەري قادام جاسادى

12 قاراشا جەكسەنبى كۇنى، اقش-تىڭ 200 سوعىس ۇشاعىن تيەگەن ءۇش الىپ اۆياماتكاسى (ۇشاق تاسىمالداۋشى كەمە) وزگە دە بىرنەشە سوعىس كەمەلەرىمەن بىرگە جاپون تەڭىزىندە اسكەري جاتتىعۋ جاسادى. بۇل اقش پەن سولتۇستىك كورەيا ءبىر-بىرىنە سوعىس قاۋپىن ءتوندىرىپ تۇرعان ۋاقىتتا، اقش-تىڭ سوڭعى ون جىلدا وسى ايماقتاعى ەڭ سالماقتى اسكەري ارەكەتى بولىپ تابىلادى. بۇل تۋرالى «WSJ» باسىلىمى حابارلادى.

رەيگان اتتى الىپ سوعىس كەمەسىندەگى اسكەري لاۋازىمدىلاردىڭ حابارىنا قاراعاندا، سەيسەنبىگە دەيىن جالعاساتىن اسكەري جاتتىعۋ بارىسىندا، اقش، جاپونيا جانە وڭتۇستىك كورەيا اسكەري كۇشتەرى تۇتقيىلدان جاسالعان شابۋىلدارعا قارسى تۇرۋ جاتتىعۋىن وتكىزبەك ەكەن. بيىلعى اسكەري جاتتىعۋ شۇعىل جاعدايدا وتۋدە. ونىڭ ۇستىنە اقش-تىڭ ءۇش بىردەي الىپ سوعىس كەمەسىنىڭ كورەي تۇبەگىنە جاقىن كەلۋى 2007 جىلدان كەيىن بولىپ كورمەگەن. جاقىندا عانا وسى وڭىرگە ساپارلاپ قايتقان اقش پرەزيدەنتى دونالد ترامپتىڭ ايتۋىنشا، بۇل قادام سولتۇستىك كورەيانىڭ يادرولىق باعدارلاماسىن دامىتۋىنا جاساعان ەسكەرتۋى.

ترامپتىڭ سەۋلدە سويلەگەن 34 مينۋتتىق سوزىندە ءۇش اۆياماتكانىڭ اقش-تىڭ ستراتەگيالىق اكتيۆتەرى بولىپ سانالاتىنىن، وسى الىپ اسكەري تەحنيكالاردى وڭىرگە الىپ كەلۋ ارقىلى سولتۇستىك كورەيانىڭ ارانداتۋشىلىق ارەكەتتەرىنەن باس تارتۋىن ءۇمىت ەتەتىندىگىن ايتقان بولاتىن. ال سولتۇستىك كورەيانىڭ مەملەكەتتىك تەلەارنالارىنىڭ بەرگەن حابارىندا، ترامپتىڭ سوڭعى قادامدارى ارقىلى ءوزىنىڭ «سوعىس ساۋداگەرى» ەكەنىن دالەلدەدى دەپ سىنعا الدى جانە ترامپتىڭ Twitter پاراقشاسىندا سولتۇستىك كورەياعا باعىتتاعان پىكىرىن ايىپتادى.

اقش قورعانىس سالاسىنداعى ساراپشىلاردىڭ ايتۋىنشا، سوعىس بولا قالعان جاعدايدا، سولتۇستىك كورەياعا قارسى ەڭ پارمەندى ءادىس، توقتاۋسىز اۋە شابۋىلى بولماق ەكەن. ال، اقش-تىڭ بۇل رەتكى جاپون تەڭىزىنە اكەلگەن ءۇش اۆياماتكاسىنداعى F-18 ۇشاقتارى، شابۋىل بۇيرىعىن الا سالىسىمەن، سولتۇستىك كورەيانىڭ كەڭىستىگىنە بىرنەشە مينۋتتا ۇشىپ جەتە الادى.

“The Qazaq Times”